भांगरभूंय | प्रतिनिधी
लखनौ, खबरां संस्था: देशांतल्या हॉस्पिटलांतल्यो नर्सी आनी दोतोर सुरक्षीत नाशिल्ल्याच्यो घडणुको परत परत मुखार येतात. दोन दिसां आदीं मुंबयच्या सायन हॉस्पिटलांत एके बायल दोतोराक दुयेंतीन आनी ताच्या सोयर्यांनी मारपेट करपाचो यत्न केलो. हे घडणुके उपरांत आतां उत्तर प्रदेशांतल्यान धक्को दिवपी घडणूक मुखार आयल्या. एका खाजगी हॉस्पिटलांत काम करपी २० वर्सां पिरायेचे बायलेचेर हॉस्पिटलांतल्या दोतोरानूच बलात्कार केल्ल्याची घडणूक घडली. पिडिस्ताच्या बापायन दाखल केल्ले कागाळी प्रमाण, हो गुन्यांव आयतारा घडलो. पुलिसांनी तिगांक अटक केल्या.
शेनवारा ही २० वर्सांची तरणाटी सांजेच्या ७ वरांचेर हॉस्पिटलांत आपले शिफ्टीक आयली. ह्या हॉस्पिटलांत ती फाटल्या सात म्हयन्यां सावन काम करता. पुलीस अधीक्षक मीना हांणी सांगलें, ‘आनीक एक नर्स मेहनाझ आनी वॉर्ड बॉय जुनैद हांणी पिडेस्ताक डॉ. शाहनवाज हांची भेट घेवपाक सांगलें. मात पिडेस्तान न्हयकार दिले उपरांत मेहनाझ आनी जुनैदन तिका सगळ्यांत वयले माळयेर एके कुडींत व्हरून बंद केली.
डॉ. शाहनवाज हांणी उपरांत तिचेर बलात्कार केलो आनी तिका थंयच बंद करून दवरली. तिका मारून उडोवपाचीय धमकी दिली आनी जाती वयल्यान वायट उतरांय दिलीं.’
नर्स मेहनाझ, वॉर्ड बॉय जुनैद आनी डॉ. शाहनवाज हांकां अटक केल्या. भलायकी विभागान ह्या हॉस्पिटलाची तपासणी केले उपरांत मुखेल वैजकी अधिकारी डॉ. कुलदीप सिंह हांच्या आदेशा उपरांत हॉस्पिटलाक कुलूप घालें. हे विशीं पुलीस फुडलो तपास करतात.
जम्मू-काश्मीरांत बायल दोतोराचेर हल्लो
जम्मू- काश्मीरच्या राजौरी जिल्ह्यांतल्या एका हॉस्पिलांत सोमारा बायल दोतोराचेर दुयेंतीन हल्लो केलो. आरोपी गुरप्रीत सिंह हांणी बायल दोतोराक वायट वागणूक दिले उपरांत उपजिल्हो हॉस्पिटलांतल्या दोतोर आनी नर्सीनी काम बंद आंदोलन करून निशेध उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
