भांगरभूंय | प्रतिनिधी
हाथरस, खबरां संस्था ः चेन, स्क्रू आनी ब्लेडी सयत 65 वस्तू गिळिल्ल्यान एका 14 वर्सां पिरायेच्या भुरग्याक मरण आयिल्ल्याची धक्को दिवपी घडणूक उजवाडाक आयल्या. ती उत्तर प्रदेशांतल्या हाथरसांत घडली. दिल्लीच्या सफदरजंग हॉस्पिटलांत पांच वरां शस्त्रक्रिया केले उपरांत दोतोरांनी भुरग्याच्या पोटातल्यांन ह्यो वस्तू भायर काडल्यो. पूण उपचारा वेळार भुरग्याक मरण आयलें. ह्या भुरग्याचे नांव आदित्य शर्मा.
‘टायम्स ऑफ इंडिया’ चे खबरे प्रमाण, आदित्यान 13 ऑक्टोबराक आपल्या बापायक सांगिल्लें, आपणाक स्वास घेवपाक त्रास जाता. उपरांत बापायन ताका हॉस्पिटलांत व्हेलो. पूण घरा येतकच ताका परतून त्रास जावंक लागलो. देखून ताच्या बापायन ताका परतून जयपूरच्या हॉस्पिटलांत व्हेलो. पूण थंय लेगीत योग्य उपचार जावंक नाशिल्ल्यान तांणी ताका अलीगढांतल्या हॉस्पिटलांत व्हेलो.
अलीगढांत दोतोरान ताचे सीटी स्कॅन केले उपरांत ताच्या श्वास घेवपाचे नळयेंत ब्लॉकेज आशिल्ल्याचे दिसून आयलें. उपरांत त्याच हॉस्पिटलांत ताचेर शस्त्रक्रिया केली. पूण दोन- तीन दिसां उपरांत ताच्या पोटांत दुखपाक लागले, देखून ताची अल्ट्रासाऊंड चांचणी केली. तेन्ना भुरग्याच्या पोटांत 19 वस्तू आशिल्ल्याचें दिसून आयलें. देखून दोतोरान ताका नोयडाच्या एका हॉस्पिटलांत वचपाचो सल्लो दिलो.
नोयडाच्या खाजगी हॉस्पिटलांत व्हेले उपरांत ताची परत एक फावट अल्ट्रासाऊंड चांचणी केली. ते वेळार दोतोरान भुरग्याच्या पोटांत 49 वस्तू आशिल्ल्याचें सांगलें. आनी उपरांत ताका दिल्लीच्या सफदरजंग हॉस्पिटलांत वचपाक सांगलें. थंय परत एक फावट अल्ट्रासाऊंड चांचणी केले उपरांत दोतोरान भुरग्याच्या पोटांत 65 वस्तू आशिल्ल्याचें स्पश्ट सांगलें.
मजगतीं, दोतोरांनी पांच वरां शस्त्रक्रीया करून ह्यो वस्तू भायर काडपाचो यत्न केलो. पूण उपचारा वेळार ताच्या पोटांत इन्फेक्शन जाल्ल्यान ताका मरण आयलें. ल्हान आसतना ह्या भुरग्यान ह्यो वस्तू गिळ्ळ्यो आसूं येता जाचो त्रास ताका आतां जातालो अशें दोतोरांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
