भांगरभूंय | प्रतिनिधी
लखनो, खबरां संस्था: फास्ट फूड खावन दिल्लीच्या राम मनोहर लोहिया हॉस्पिटलांत युपीच्या अमरोहा हांगच्या १२वेच्या वर्गांत शिकपी इलमा नदीम ह्या १८ वर्सां पिरायेचे विद्यार्थीनीक मरण आयलें. इलमाक म्हयन्या आदीं टायफॉयड जाल्लो. ते उपरांत तिची भलायकी इबाडत गेली.
नोयडाच्या खाजगी हॉस्पिटलांत सीटी स्कॅन आनी एमआरआय केलें तेन्ना तपासणेंत इल्माच्या मेंदवांत २०-२५ गांठी मेळ्ळ्यो. दोतोरांच्या म्हणण्या प्रमाण, ह्यो गांठी परजीवी (टेपवर्म) संसर्गाक लागून आसूं येतात, जो फास्ट फुडांत वापरिल्ल्या कोबींतल्यान कुडींत पावला आसूं येता.
अमरोहांतल्या आनीक एका अश्याच दुयेंती विशीं जाणून घेवया: डिसेंबर २०२५ वर्सा अमरोहांत फास्ट फूड खावन ११वेक शिकपी एका विद्यार्थ्याक मरण आयिल्लें. दिल्लीक एम्सांत ताचेर उपचार पद्दत सुरू आशिल्ले. फास्ट फूड चड खाल्ल्यान चलयेच्यो आंतकड्यो एकठांय दसून उरल्यात अशें दोतोरांनी सांगलें. तिचें पचन तंत्र पुरायपणान इबाडिल्लें. तिका मरण आयलें. अहाना भुरगेपणा सावन घरांत शिजयल्ल्या जेवणाच्या बदला चायनीज, पिझ्झा आनी बर्गर खातालें अशें कुटुंबांतले लोक सांगतात. तिच्या मरणाचें कारण फास्टफुडच आशिल्लें.
फास्ट फूड खावप कितलें धोक्याचें?
गोरखपूर वैजकी म्हाविद्यालयांतली आहारतज्ञ पद्मिनी शुक्ला हिच्या मता प्रमाण, घरगुती, ताजें आनी समतोल अन्न भलायके खातीर सगळ्यांत बरें. फास्ट फुडांत चरबी, मीठ आनी रसायनां खूब आसतात. हें सगलें कुडीक लुकसाण करपाक शकतात. भायलें जेवण खावपाचें आसल्यार, तें दर दिसा खावचें न्हय. तें मर्यादीत प्रमाणांत खावचें. घरांत शिजयल्लें जेवण नेमान खाल्यार जायत्या गंभीर दुयेंसांचो धोको उणो जावंक शकता. खावपाक तयार आशिल्लें अन्न आमच्या काळजाक जितलें धोक्याचे आसता तितलेंच आमच्या मेंदवाकय धोक्याचे आसता. फास्ट फुडांतली ट्रान्स चरबी आनी साकर हांचो याद दवरपाचे आनी निर्णय घेवपाचे तांकीचे वायट परिणाम जाता.हें चड खाल्यार डिमेंशिया सारकिलेे धोक्याचे रोगूय जावंक शकतात.
टेपवर्म म्हणल्यार कितें, तो आंगात कसो पावता?
टेपवर्म हो एक तरेचो परजीवी, जो चड करून आमच्या जेवणांतल्यान कुडींत भितर सरता. भाजीपालो धुवन वा सारको शिजयनासतना खाल्यार हो किडो आंगांत भितर सरून रगतांतल्यान मेंदवा मेरेन पावूंक शकता. हाका लागून न्यूरोसिस्टीसर्कोसिस नांवाचो गंभीर रोग जावंक शकता. ताचीं लक्षणां म्हळ्यार तकली दुखप आनी आळस येवप. सगळी पाचवी भाजी खावचे पयलीं बरी निवळ करून धुवन शिजोवची. हाका लागून अशे धोके टाळूंक मेळटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
