भांगरभूंय | प्रतिनिधी
नोयडा, खबरां संस्था ः शेतांत जायते जाण गांजाची लागवड करतात. पूण एका मनशान शेतांत गांजा लावचे बदला फ्लॅटात तो लायिल्ल्याचे प्रकरण उत्तर प्रदेशांतल्या ग्रेटर नोयडांत उक्ताडार जाला. ह्या प्रकरणांत संबंदीत व्यक्तीचेर पुलिसांनी कारवाय केल्या.
ग्रेटर नोयडाच्या पॉश सोसायटींतल्या फ्लॅटाचेर पुलिसांनी धाड घाली. एका मनशान त्या फ्लॅटांत बेकायदेशीरपणान गांजाची लागवड केल्ल्याचे दिसून आयलें.
मेळिल्ले म्हायती प्रमाण, पुलिसांनी राहुल नांवाच्या तरणाट्याक अटक केल्या. राहुल हो गांजो डार्क वेबा वरवीं विकतालो. ताचे कडल्यान गांजो आनी वेगवेगळें सामान जप्त केला. तशेंच राहुल हो गांजो खंय विकतालो? हातूंत आनीक कोणाचो आस्पाव आसा? हे संबंदी तपास सुरू आसा अशें पुलिसांनी सांगलें.
आरोपीक इंग्लीश भाशेची बरी जाण आशिल्ली. ताका इंटरनॅटाचेंय बरें गिन्यान आसा. गांजो लागवड करपाची पद्दत आरोपींन इंटरनॅट आनी सोशल मिडिया वरवीं शिकली. परदेशी संकेतथळा वरवीं ऑनलायन ऑर्डर दिवन गांजाच्यो बियो मागयल्यो. उपरांत आपल्या फ्लॅटांतल्या एअर कंडिशनाच्या आदारान विशिश्ट तापमानांत गांज्याच्यो बियो लायल्यो आनी पीक तयार केलें. मजगतीं, ओटीटीचेर सिनेमांतल्या गांजो लागवडीच्या प्रकार पळोवन फ्लॅटांत गांजो लागवड केल्ल्याचे प्राथमीक चवकशेंतल्यान कळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
