भांगरभूंय | प्रतिनिधी
नवी दिल्ली, खबरां मेज: खर उश्णताये उपरांत बिरेस्तारा उत्तर प्रदेश-बिहारा सयत उत्तर भारतांतल्या राज्यांत घोग्यांनी पावस आनी वीज, गडगड्या सयत वादळ पळोवपाक मेळ्ळें. उत्तर प्रदेशांत फाटल्या २४ वरांनी १३ जाणांक मरण आयलें. अयोध्येंत ६, बाराबंकी ५ आनी अमेठी आनी बस्तींत दरेकी एकलो वीज कोसळून आनी वादळाक लागून सोपल्यात. आयज उत्तर प्रदेशांतल्या ३७ जिल्ह्यांनी पावसाची शिटकावणी दिल्या.
हिमाचल प्रदेशांत दोन आनी पश्चीम बंगालांत वीज कोसळून एकल्याक मरण आयलें. सेगीत दुसर्या दिसा हवामान खात्यान २४ राज्यांनी वादळ आनी पावसाची शिटकावणी जारी केल्या. जम्मू-काश्मीर, लडाख, हिमाचल प्रदेश आनी हरियाणाक पावसाचो ऑरेंज अलर्ट जारी केला.
आयज राजस्थानांतल्या ९ जिल्ह्यांनी उश्णतायेचें ल्हार आनी खुल्लाच्या वादळाची शिटकावणी दिल्या. काल, बिकानेर आनी बारमेरांत पारो ४५.१ आनी ४५ अंश सेल्सिअस आशिल्लो.
हिमाचलांत ६०-८० किमी दर वराक वेगान वादळ बुधवारा मध्याराती कडेन आयिल्ल्या वादळाक लागून हिमाचल प्रदेशांत व्हड लुकसाण जालें. ६० ते ८० किमी दर वराक वेगान व्हांवपी वार्याक लागून जायत्या घरांचें पांखें उडून गेलें. जायते कडेन झाडां हुमटून पडलीं आनी लायटीच्यो सरयोय तुटल्यो. हाका लागून हिमाचलच्या अर्ध्या भागांत लायट नाशिल्ली.
शुक्रारा महाराष्ट्रांतल्या स जिल्ह्यांनी वादळाचो ऑरेंज अलर्ट आसा – चंबा, कांगडा, कुल्लू, मंडी, शिमला आनी लाहौल-स्पिती. जाल्यार १९ एप्रिलाक ९ जिल्ह्यां खातीर ऑरेंज अलर्ट आसा आनी २० एप्रिलाक येलो अलर्ट आसा. हवामान खात्याच्या ह्या अदमासाक लागून शेतकारांची चिंता वाडल्या. हें आपोलाच्या पिका खातीर खूब माल थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
