भांगरभूंय | प्रतिनिधी
लखनौ, खबरां संस्था: उत्तर प्रदेशांत गोमांस आनी गाय कत्तलीचेर बंदी घाल्या. उत्तर प्रदेश सरकारान गायांच्या संरक्षणा खातीर गोशाळा स्थापन केल्यात आनी जायते गोरक्षक गायींचो सांबाळ करपाक वावुरतना दिसतात. पूण ह्याच उत्तर प्रदेशांत योगी आदित्यनाथ हांचें सरकार आसून लेगीत दर दिसा ५० हजार गाय कत्तल जातात.
पीटीआयच्या अहवाला प्रमाण नंदकिशोर गुजर हांणी म्हणलां, आमचें सरकार आसून लेगीत दर दिसा ५० हजार गायांची कत्तल करतात. गाय कल्याणा खातीर थारायिल्लो निधी अधिकारी खातात. सगळेकडेन लुटमार चल्ल्या. ही गजाल मुख्यमंत्री योगी आदित्यनाथ हांचे कडेन पावपाक जाय. जायत्या आमदारांनी हो हुस्को उक्तायला. हे विशीं मुख्यमंत्री योगी आदित्यनाथ म्हायती मेळ्ळ्या काय ना? म्हाका कल्पना ना. ह्या सगळ्या भ्रश्टाचारी लोकांचो मुखेली राज्याचो मुखेल सचीव. तशेंच लोणी विधानसभा मतदारसंघांत दोन पुलीस हवालदारांनी पयशे घेवपाचो व्हिडियो हालींच उजवाडाक आयला अशें तांणी सांगलें.
उत्तर प्रदेशांतलें भाजपा सध्या एकामेकांचेर आरोप करपाक लागल्यात. भाजपा मंत्री, भाजपा आमदार हांच्या खांदार बंदूक दवरून कोण तरी पयसुल्ल्यान भाजपाच्या फुडार्यांक निशाणो करता. ह्या सत्तेच्या संघर्शांत लोक आनी प्रशासन घुस्पता. भ्रश्टाचाराच्या पयशांचेर ही झगडीं चलता. आतां भाजपाचे समर्थक लेगीत ‘आमकां आयचो भाजपा पक्ष नाका’ अशें म्हणपाक लागल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
