भांगरभूंय | प्रतिनिधी
संभल, खबरां संस्था: खंयचीय बायल जर गोळ घेतिल्ले अवस्थेंत सांपडली आनी तिच्या शरिरावेल्यो जखमो जर तिचो खून जाल्ल्याचें दाखोवन दिता, जाल्यार तिच्या पोस्टमार्टम रिपोर्टांत मात तिणें आत्महत्त्या केल्ल्याचें नोंद जातालें. उत्तर प्रदेशांतल्या संभल जिल्ह्यांत एक धक्को दिवपी गजाल मुखार आयल्या. म्हत्वाची गजाल म्हळ्यार हें सगळें फकत ५० हजार रुपया दिवन करताले. इतले पयशे दिले काय खुनाचें रुपांतर आत्महत्त्येंत जातालें. छळ जाल्ल्याच्यो जखमो पुसताले आनी घाव्यां विशीं फटींग म्हायती आशिल्लें पोस्टमार्टम आनी वैजकी अहवाल तयार करताले.
सध्या पुलीस ह्या रॅकेटाची चवकशी करतात. ह्या प्रकरणांत सात जाणांक अटक केल्या. मरणाच्या प्रमाणपत्रांत घोटाळो केल्ल्या प्रकरणांत ३२ परस चड दोतोरांची चवकशी करतात.
हे विशीं मेळिल्ले म्हायती प्रमाण, हो सगलो घोटाळो फार्मसिस्ट, वॉर्ड बॉय आनी दोतोरांच्या एकमतान घडला. हातूंत पयशे घेवन म्हत्वाची वैजकी आनी पोस्टमार्टमांतल्यान मुखार आयिल्ली म्हायती बदल्ल्या आसत असो आरोप आसा. एके १९ वर्सां पिरायेचे मंजू नांवाचे चलयेचो खून आत्महत्त्या म्हणून दाखयल्ल्याच्या प्रकरणांत हें पुराय रॅकेट उक्ताडार आयलें. तिच्या कुटुंबियांनी तिचो गळो दामून खून केलो आनी पोस्टमार्ट रिपोर्टांत बदल करपा खातीर एक फार्मासिस्ट आनी वॉर्ड बॉयाक ५० हजार रुपया दिले.
ह्या प्रकरणांतलो मुखेल आरोपी बाहजोई सीएचसी हांगचो फार्मासिस्ट मधुर आर्य आनी वॉर्ड बॉय आनी कंप्युटर ऑपरेटर यश शर्मा हांकां अटक केल्या.
ह्या प्रकरणाच्या तपासांत व्हॉट्सऍप चॅट आनी आर्या हाच्या फोनार जाल्लें गुगल पे आनी फोन पे वरवीं केल्लो पयशांचो वेव्हार मेळ्ळा. जातंत अशे तरेच्या शेकड्यांनी प्रकरणांनी अशेत तरेन घोटाळो केल्ल्याचें मुखार आयलें.
घोटाळो कसो उक्तडार आयलो?
३१ मेक मंजू ही तिच्या हरदासपूर गांवांतल्या घरांत गोळ घेतिल्ले अवस्थेंत दिसून आयली. तिच्या कुटुंबियांनी पिडेस्ताच्या इश्टाक दोशी थारायलो. मात पुलीस तपासांत वेगळेंच दिसून आयलें. मोबायल डेटांत अशें दिसून आयलें, आरोपी घडणूक घडली तेन्ना त्या वाठारांत नाशिल्ले. मात मंजुचो बापूय, भाव आनी हेर सोयरीं आशिल्लीं. फुडल्या तपासांत मंजुच्या मरणाच्या कांय वेळा पयलींच कुटुंबियांनी फोन कॉल केल्ल्याचें मुखार आयलें.
चवकशे मजगतीं, आर्यान कबूल केलें की मंजुच्या कुटुंबान तिचो खून केलो आनी तिणें आत्महत्त्या केल्ल्याचें घडोवन हाडलें. इतलेंच न्हय तर तिच्या इश्टाक फटोवपा खाती पोस्टमार्टम रिपोर्टांत गळो दामून खून केल्ल्याचें दाखोवपा खातीर आर्याची मजत घेतली. हे खातीर ५० हजार रुपया दिले.
हाचे उपरांत मंजुचो बापूय चंद्रकेश, तिचो भाव धर्मेंद्र आनी सोयरीं जयप्रकाश आनी प्रवेश हांकां अटक केली. उपरांत जांणी रिपोर्ट डिजीटल पद्धतीन एडीट केलो त्या यश शर्मा हाकाय अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
