भांगरभूंय | प्रतिनिधी
-122 जाणांक मरण, सान भुरगीं आशिल्ल्या बायलांचोय आस्पाव
हाथरसः उत्तर प्रदेशांतल्या हाथरसांत धर्मीक कार्यावळींत गचमुड्डी जावन हे घडणुकेंत आतां मेरेन 122 जाणांक मरण आयलां. हातूंत व्हड प्रमाणांत बायलां अानी सान पिरायेच्या भुरग्यांचो आस्पाव जाता.
ही घडणूक उत्तर प्रदेशांतल्या हाथरसांतल्या रतिभापूर गांवांत घडल्या. ह्या गांवांत विश्व हरि भोले बाबाचो सत्संग आयोजीत केल्लो. हे कार्यावळीक सुमार 1,500 नागरीक हाजर आसले. तातूंत मुखेलपणान बायलांचो आस्पाव आशिल्लो. हे कार्यावळीक थळाव्या प्रशासनानय मान्यताय दिली. मजगतीं, सत्संगाच्या वेळार गचमुड्डी जाली. हातूंत सुमार 122 जाणांक मरण आयलें.
आतां मेरेन शंबरां परस चड लोकांक सरकारी हॉस्पिटलांत दाखल केल्यात. पूण आतां ह्या हॉस्पिटलाची दुयेंती दाखल करपाची तांक सोंपल्या. देखून आमी खाजगी हॉस्पिटलांक दुयेंतींक दाखल करपाक सांगलां अशी म्हायती हाथरसाचे मुखेल वैजकी अधिकारी उमेश कुमार त्रिपाठी हांणी दिली. तशेंच ही घडणूक नेमकी कशी घडली? हे संबंदी चवकशी चालू आसा अशेंय तांणी सांगलें.
——————
उत्तर प्रदेशाचे मुख्यमंत्री योगी आदित्यनाथ हांणीय हे घडणुके उपरांत प्रतिक्रिया दिल्या. हाथरसांत जें घडलें तें दुर्दैवी आसा. हे घडणुकेंत मरण आयिल्ल्यांच्या कुटुंबांक संवेदना उक्तायल्या. घडणूक थळार झुजा पांवड्यार बचाव आनी आदार काम चालू आसा. जखमींक उपचारा खातीर हॉस्पिटलांत दाखल केल्यात,
-योगी आदित्यनाथ, मुख्यमंत्री
——————–
राहुल म्हणाले- सरकारने संवेदनशीलतेने मदत करावी
हाथरस दुर्घटणेचेर सरकारान संवेदनशीलतेन लोकांक मजत करची. जांणी आपले कुटुंबीय वगडायल्यात, त्या सगल्या कुटुंबियांक आपूण संवेदना उक्तायता.
-राहूल गांधी
—————–
प्रधानमंत्री मोदी हांणी सभाघरांत उक्तायलें दुख्ख
प्रधानमंत्री नरेंद्र मोदी हांणी लोकसभा सभाघरांत हाथरस दुर्घटणेचो उल्लेख केलो. उत्तर प्रदेशांतल्या हाथरसांत जाल्ले गचमुड्डींत मरण आयिल्ल्यांच्या कुटुंबियां प्रती संवेदना आनी दुख्ख उक्तायल्या. केंद्राचे वरिश्ठ अधिकारी राज्य सरकारच्या संपर्कांत आसात. पिडीतांक शक्य ती सगली मजत करतले.
-नरेंद्र मोदी, प्रधानमंत्री
——————
कुडी पळोवन पुलीस कॉस्टेबलाक आताकाचो धपको
एटांतल्या मेडिकल कॉलेजीत कुडी पळोवन डुटयेर आशिल्ल्या कॉन्स्टेबल रजनीश (30) हाका आताकाच्या धपक्यान मरण आयलें. ते वैजकी म्हाविद्यालयांत आपत्कालीन सेवा दिताले. इतले कुडी पळोवप तांकां सोंसना जाले. तो मूळचो अलिगडचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
