भांगरभूंय | प्रतिनिधी
उत्तर प्रदेश, खबरां संस्था ः अमेठींत बिरेस्तारा शाळा शिक्षकाच्या पुराय कुटुंबाची हत्या जाल्या. मोगाच्या संबंदाक लागून ती जाल्ल्याचें कळटा. ह्या प्रकरणांत पुलिसांनी चंदन वर्मा हाका मुखेल दुबावीत अशें सांगलें. शिक्षकाची घरकान्न आनी चंदन एकामेकांच्या संपर्कांत आशिल्ले अशेंय तांणी सांगलें.
सरकारी शाळेचो शिक्षक सुनील कुमार (34) हांकां 18 ऑगस्टाक तांच्या घरकान्नीच्या मोगा संबंद प्रकरणाची म्हायती मेळ्ळी. देखून तांणी घरकान्नीक एससी/ एसटी कायद्या खाला चंदना आड एफआयआर नोंद करपाक लायली. चंदनान कुटुंबाक धमकी दिल्ल्याचो आरोप एफआयआरांत केलो. आमच्या कुटुंबाचे कितेंय बरें वायट जाल्यार चंदनाक जापसालदार धरचो असोय उल्लेख तांणी कागाळींत केल्लो.
हे कागाळी उपरांत शिक्षकाची घरकान्न आनी चंदन एकामेकां कडेन संपर्कांत नाशिल्ले. पूण, कांय दिसा उपरांत चंदनान परतून कुटुंबाक त्रास दिवपाक सुरवात केली. सुनीला कडेन लग्न जावचे पयलीं ताचे बायलेचो चंदना कडेन मोग चलतालो, अशें पुलिसांनी सांगलें.
बिरेस्तारा चंदनान घरांत घुसून शिक्षक सुनील, ताची घरकान्न आनी ताच्या दोन धुवांची हत्या केली. ताणें शिक्षकाचेर तीन, बायलेचेर दोन आनी दोनूय धुवांचेर दरेकीं एक फावट फारपेट केलो. इतलेंच न्हय तर तांची हत्या करचें पयलीं तांणे “आयज लोकांक मरण येतलें” असो व्हाट्सअॅप स्टेटस दवरिल्लो.
खून जाले उपरांत लागसारचे मेडिकल स्टोर चलोवपी राम मनोहर यादव हांकां फारपेटाचो आवाज आयलो. तेन्ना ते रोखडेच थंय धांवले. थंय घडिल्ली घडणूक पळोवन तांणी पुलिसांक कळयलें. उपरांत सुनीलाचो बापूय राम गोपाळ हांचे कागाळीचेर आदारुन खुनाच्या आरोपांत चंदना आड एफआयआर नोंद केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
