भांगरभूंय | प्रतिनिधी
मुख्यमंत्रीः दक्षीण गोंय 60 हजार मतांनी जोडटले
भांगरभूंय । प्रतिनिधी
पणजीः येता ते लोकसभा वेंचणुकेंत उत्तर गोंयांतलो भाजपा उमेदवार एक लाखांच्या फरकान जिखतलो, असो ठाम विस्वास मुख्यमंत्री डॉ. प्रमोद सावंत हांणी सोमारा पत्रकारां कडेन उलयतना उक्तायलो. हे आदीं तांणी दक्षीण गोंयांतलो उमेदवार 60 हजारांच्या मताधिक्क्यान जिखतलो, अशें म्हणिल्लें.
लोकसभा वेंचणूक कांय म्हयन्यांचेर पावल्या. ताका लागून भाजपान वेंचणुकेची नेटान तयारी सुरू केल्लया. फाटले खेपे दक्षीण गोंय मतदारसंघ भाजपाच्या हातांतल्यान गेल्लो. पूण हे खेपे खंयचेय परिस्थितींत गोंयांतल्यो दोनूय सुवातो जिखपाचो निश्चेव भाजपाच्या थळाव्या आनी केंद्रांतल्या फुडाऱ्यांनी केला. ते नदरेन यत्नूय सुरू केल्यात.
येता ते वेंचणुकेंत भाजपान उत्तर गोंया परस दक्षीण गोंयाचेर चड लक्ष केंद्रीत केलां. थंयच्या भाजपा उमेदवाराक 60 हजारांच्या मताधिक्यान जिखून हाडचे खातीर फुडाऱ्यांनी झुजा पांवड्यार यत्न चलयल्यात. दक्षीण गोंय लोकसभा मतदारसंघाची जापसालदारकी आशिल्ले केंद्रीय मंत्री राजीव चंद्रशेखर हांणी हालींच दक्षीण गोंयची भोंवडी केल्या.
मजगतीं, उत्तर गोंयाचेर भाजपाचो फाटल्या साबार वर्सां सावन शेक आसा. ताका लागून हे खेपेय उत्तर गोंयांत भाजपा उमेदवारूच वेंचून येतलो आनी हे खेपे एका लाखांच्या मताधिक्यान ताका वेंचून हाडटले, अशें मुख्यमंत्री डॉ, सावंत हांणी नमूद केलें.
उत्तर गोंयांतल्यान कोण?
उत्तर गोंयांतल्यान केंद्रीय मंत्री श्रीपाद नायक 1999 सावन सेगीत वेंचून येतात. ताका लागून हे खेपेय तांकांच संद मेळटली, अशी सगळ्यांची आस्त आसा. पूण पक्षांतल्या कांय फुडाऱ्यांनी आतां उत्तर गोंयाचेर दावो केल्ल्यान भाजपान सादूर भुमिका घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
