भांगरभूंय | प्रतिनिधी
पणजीः उत्तर गोंय जिल्ह्यांतल्या जमीन महसूल प्रकरणांचो बेगोबेग निवाडो करपा खातीर जिल्होधिकारी अंकित यादव हांणी म्हत्वाचें पावल उबारलां. जिल्ह्यांतल्या बार्देश, दिवचले, पेडणें, सत्तरी आनी तिसवाडी ह्या पांच तालुक्यांच्या मामेलदार कार्यालयांतल्या प्रलंबीत आशिल्ल्या ‘म्युटेशन’ प्रकरणांचो निवाडो करपा खातीर 18 आनी 19 एप्रिलाक खाशेलो ‘म्युटेशन डिस्पोजल अँड फेसिलिटेशन कॅम्प’ आयोजीत केलां. हे मोहिमेक लागून वर्सां सावन प्रलंबीत आशिल्ल्यो फायली निकालांत करपाची शक्यताय आसा.
हें खाशेलें शिबिर शेनवार आनी आयतार (18, 19 एप्रील) सकाळीं 10:00 ते सांजेच्या 5:30 मेरेन उक्तें आसतलें. ज्या नागरिकांची म्युटेशन प्रकरणां वेगवेगळ्या कारणांक लागून प्रलंबीत आसात तांणी संबंदीत मामलेदार कार्यालयांत हाजीर रावचें आनी तांच्या प्रकरणाची सध्याची स्थिती जाणून घेवची. तशेंच, प्रलंबीत उरिल्ल्या फाटल्यान आशिल्लीं कारणां समजून घेवन गरजेचीं कागदपत्रां वा स्पश्टीकरणां सादर करपाची संद ह्या शिबिरा वरवीं दितले. नागरीकांच्या सोयी खातीर आनी प्रशासकीय कामांत पारदर्शकता हाडपा खातीर हो उपक्रम चालीक लायला अशें सुचोवणेंत म्हळां.
ह्या कॅम्पाचो लाव घेवपा खातीर नागरिकांनी आपले अर्जाचो तपशील, गरजेची कागदपत्रां, वळखपत्र, पेमेंट वा चलन तपशील आनी कार्यालयांतल्यान मेळिल्लो खंयचोय पत्रवेव्हार व्हरप सक्तीचें आसा. उत्तर गोंय जिल्होधिकाऱ्यान लोकांच्या सोयी खातीर ही नोटीस जारी केल्या. चडांत चड नागरिकांनी हे सुविधेचो लाव घेवन आपलीं प्रलंबीत कामां पुराय करचीं असो उलो प्रशासनान केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
