भांगरभूंय | प्रतिनिधी
-दोन वर्सात जातले पुरायः कामगार मंत्री बाबूश मोन्सेरातपणजीः दक्षीण गोंया प्रमाण आतां उत्तर गोंयांतूय नवे सुसज्ज इसआय हॉस्पिटल उबारतले. हे हॉस्पिटल दिवचलच्या मुळगांव वाठारांत 2 वर्सा भितर पुराय जातले. जाल्यार मडगांवां इसआय हॉस्पिटलाची स्थिती बाबत आसा, ती जाग्यार घालपा खातीर प्रशासक नेमतले, अशें कामगार मंत्री बाबूश मोन्सेरात हांणी सांगलें.
बाबूश मोन्सेरात हांचे फुडारपणा खाला गोंय राज्याची बोर्डाची 55 वी कर्मचारी राज्य विमो निगमची (इसआयसी) बसका जाली. हे बसकेक कामगार आयुक्त लेव्हीन्सन मार्टीन्स, इसआयसीची प्रशासकीय संचालक डॉ शुभांगी लोटलीकर आनी हेर अधिकारी हजर आसले.
बसकेची म्हायती दितना मंत्री मोन्सेरात हांणी सांगलें, मुळगांव -दिवचले 150 खाटींचे इसआय हॉस्पिटल येवपाचे आसा. गोंय हावसींग बोर्डा कडल्यान आमी सुवात घेतल्या. दोन वर्सा भितर सुसज्ज अशें हे हॉस्पिटल तयार जातले.
हे विशींचो आराखडो मुख्यालयांत तयार केला. सध्या दुरीग बांदपा खातीर आमी मंजुरी घेतल्या. ह्या हॉस्पिटलाचो अदमासे खर्च कितलो जातलो तो आमकां खबर ना. मुख्यालय हे विशींचो अदमास तयार करुन आमकां धाडटले आनी सगलो खर्च इसआय करतले, अशे मोन्सेरात हांणी सांगलें.
आमी मडगांवच्या इसआय हॉस्पिटलाचो नियाळ घेतला आनी थयची स्थिती सामकीच बाबत आसा. 4 सप्टेंबराक हाव स्वता पळोवणी करतलों आनी कामगार संघटणेचे वांगडी म्हजे वांगडा हजर आसतले, अशें बाबूश हांणी म्हणलें.
ह्या हॉस्पिटलाच्या उबारणे खातीर गोंय वैजकी म्हाविद्यालय वा जिल्हो हॉस्पिटलांतलो निवृत्त प्रशासक मडगांवच्या इसआय हॉस्पिटलांत प्रशासक म्हूण नियुक्त करपाचे आमी थारायला. वैजकी मशिनां, गरजेची सुविधा आनी दोतोरांची नेमणूक हातूंत प्रशासक लक्ष घालतले, अशी म्हायती बाबूश हांणी दिली.
सध्या मडगांवच्या हॉस्पिटलांत दोतोरांचो खूब उणाव आसा. दोतोरांची नेमणूक करपा खातीर आमी गोंय लोकसेवा आयोगा कडेन मागणी केल्या. मजगती आमी खाजगी हॉस्पिटला कडेन आमचो टायअप आशिल्ल्यान कंत्राटी पद्दतीचेर आमी दोतोर घेतात. 100 खाटींचे हॉस्पिटल पुराय तांकीन चलतले हे आमचे लक्ष्य आसा, अशे बाबूश हांणी सांगलें.
इसआयचे सध्या 14 कोंसुल्तोर आसात. कुंकळे उद्देगीक वसणुकेत नवे कोंसुल्तोर सुरू करपाचे आसा. जाल्यार वेर्णा आनी पिळर्ण उद्देगीक वसणुकेतले कोंसुल्तोर अपग्रेड करतले, अशें बाबूश हांणी सांगलें.
इसआयसी कर्मचारी सोसायटी स्थापन करपा विशींचो विशय बसकेक आयिल्लो. हे सोसायटी विशीं कर्मचाऱ्यांच्या मनांत भिरांत निर्माण जाल्ली. देशांतल्या चार राज्यांनी ही सोसायटी आसा. गोंयांतूय करची असो सल्लो मुख्यालयांतल्यान आयला, अशें बाबूश हांणी सांगलें.
सध्या कर्मचाऱ्यांच्या फायद्या खातीर येवजण आसा. पूण ही सोसायटी स्थापन केल्यार कर्मचाऱ्यांक फायदो जावपी असल्यो गजाली हे सोसायटी भितर ना.
देखून ह्या सोसायटीचो प्रस्ताव भायरायलो आनी पयलीचीच येवजण चालीक लावपाचे थारायले, अशें मोन्सेरात हांणी स्पश्ट केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
