भांगरभूंय | प्रतिनिधी
नवी दिल्ली, खबरां संस्था: उत्तराखंडांतल्या रानांत उजो लागपाच्या घडणुकां वयल्यान सर्वोच्च न्यायालयान उत्तराखंड सरकाराक बरेंच उजरावन काडलें. उज्याच्या वाडपी घडणुकांक सरकाराची आळसाय जापसालदार आसा अशें तांणी म्हणलां. तशेंच उज्याचेर नियंत्रण मेळोवपाक येवजण तयार आशिल्ली. मागीर ती चालीक कित्याक लावंक ना? असो प्रस्न तांणी उत्तराखंड सरकाराक विचारला.
उत्तराखंडच्या रानांत उज्याच्यो घडणुको आडावपाक राज्य सरकार अपेशी थारिल्ल्याचो आरोप करून सर्वोच्च न्यायालयांत जनहीत याचिका दाखल केली. हे याचिकेचेर आज न्यायमूर्ती बी. आर.गवई हांच्या खंडपीठा मुखार सुनावणी जाली. ह्या वेळार न्यायालयान उत्तराखंड सरकाराच्या धोरणांचेर टिप्पणी केली. तशेंच राज्याच्या मुखेल सचिवांक १७ मेक न्यायालयांत हाजीर रावपाचे आदेशूय न्यायालयान दिले.
हे सुनावणे मजगतीं उत्तराखंडांतलें ४० टक्के रान उज्याच्या चपक्यांत सांपडिल्ल्याचें याचिकाकर्त्यांनी न्यायालयांत सांगलें. तशेंच उजो लागपाच्यो घडणुको घडटना वनविभागाच्या कर्मचार्यांक वेंचणुकेच्या कामार नियुक्त केल्ले, हेंय तांणी न्यायालयाच्या निर्देशनाक हाडून दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
