भांगरभूंय | प्रतिनिधी
उत्तराखंड, खबरां संस्था ः उत्तराखंडांतल्या मदरसांनी ‘ऑपरेशन सिंदूर’ शिकयतले. हाचे वरवीं भुरग्यांक देशांतल्या सैनिकांच्या त्यागाची आनी शौर्याची वळख जातली. हो निर्णय उत्तराखंड मदरसा बोर्डान घेतला. भुरग्यांक देशाच्या इतिहासाची आनी सैन्याच्या शौर्याची वळख आसची अशें मंडळाक दिसता.
मुफ्ती शामुन कासमी दिल्लींत संरक्षण मंत्री राजनाथ सिंह हांकां मेळ्ळें. ऑपरेशन सिंदूर खातीर तांणी तांकां परबीं दिली. तांणी सांगलें, उत्तराखंडांत 451 मदरसा आसात, तातूंत सुमार 50 हजार भुरगीं शिकतात. तांकां सगळ्यांक ‘ऑपरेशन सिंदूर’ विशीं पुराय म्हायती दितलें.
बोर्डाचे अध्यक्ष मुफ्ती शमून कासमी हांणी सांगलें, भुरग्यांक मुखेल प्रवाहांतल्या शिक्षणा कडेन जोडपा खातीर मदरसांनी एनसीईआरटीचो अभ्यासक्रम चालीक लायलां. हाका लागून मदरसांनी खूब सुदारणा जाल्या. आतां आमी ‘ऑपरेशन सिंदूर’ ची येसस्वी यशोगाथा आमच्या भुरग्यां मेरेन पावपाक सोदतात.
देशांतल्या लोकांनी सैन्याच्या शौर्याची तोखणाय केल्या. मदरसाच्या भुरग्यांकय सैनिकांच्या शौर्याची म्हायती दितले. ‘ऑपरेशन सिंदूर’ हो धडो नव्या अभ्यासक्रमांत आस्पावतले. हे खातीर बेगीनूच अभ्यासक्रम समितीची बसका आपयतले अशें कासमी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
