भांगरभूंय | प्रतिनिधी
डेहराडून, खबरां संस्था ः ग्लोबल वॉर्मिंगाच्या संकश्टांत संवसारभरातल्यो हिमखंड आकुंचन जावपाक लागल्यात म्हणून उत्तराखंडांतल्या हिमालयांतल्या हिमन्हंयेचो आकार दर वर्साक 163 मीटर इतलो वाडत आसात. ही एक असामान्य घडणूक. हाका लागून शास्त्रज्ञ घुस्पल्यात आनी ताचे फाटलें कारण सोदून काडपा खातीर नवे संशोधन सुरू केलां.
हो हिमखंड चमोली जिल्ह्यांतल्या नीति दरी लागसारच्या उंच हिमालयाच्या धौली गंगा देगणांत अविगामी दोंगर माळेच्या सकयल आसा. वाडिया हिमालयन इन्स्टिट्यूट ऑफ जियोलॉजीचे शास्त्रज्ञ 2019 वर्सा सावन ताचेर नदर दवरुन आशिल्ले. आतां ताचो पयलो संशोधनात्मक निबंद प्रसिद्ध जालां.
ते प्रमाण 2001 वर्सा तें 7 मीटर दर वर्सा वाडटाले. आतां ही गती वर्साक 163 मीटर पावल्या. सद्या ताचो वट्ट क्षेत्रफळ 48 चौखण किमी आसा, जो 2019 वर्सा 39 चौखण किमी आशिल्लो. तिबेटाच्या दिकेन तें वाटचाल करता पूण दिसाक 27 मीटर गतीन दिका बदलता.
भारताच्या भूवैज्ञानिक सर्वेक्षणाच्या मतान हिमालयाच्या वाठारांत 9,527 हिमन्हंयो आसात. तातूंतले उत्तराखंडांत सुमार 3600 आसात. ह्या सगळ्यांतले फकत अचल पर्वताचेर आशिल्ली हिमन्हंय वाडत आसा अशें उपगिऱ्यातल्यान मेळिल्ल्या म्हायती प्रमाण दिसून येता. हेर सगळ्यो न्हंयो संकुचित जावपाक लागल्यात.
मजगतीं, अशें तरेन हिमन्हंयांचो आकार वाडलो जाल्यार हिमालयाच्या वाठारांत व्हडली आपत्ती येवंक शकता. अशे हिमखंड चड करून अलास्का हांगा दिसतात. पूण, हिमालयांत पयलेच खेपे अशें घडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
