भांगरभूंय | प्रतिनिधी
लखनौ, खबरां संस्था : उत्तरप्रदेशांतल्या देवरियांत काळजाक पीळ घालपा सारकी घडणूक घडली. हांगा एकाच कुटुंबांतल्या ५ जाणांक घरांत भितर सरून मारून उडयल्यात. घोव- बायल, दोन धुवो आनी एका पुताक कापून आनी उपरांत तांचेर फारपेट करून जिवेशीं मारले. आतां ह्या कुटुंबांत फकत एकटो ८ वर्सां पिरायेचो भुरगो जिवो आसा. पूण तोय गंभीर आसा.
ही घडणूक आदले जिल्हो पंचायत वांगडी प्रेम यादव हांच्या कुटुंबीयांनी केल्ल्याचो दुबाव आसा. सोमारा सकाळीं ६ वरांचेर प्रेम यादवाची कूड रस्त्यार पडिल्ली मेळ्ळी. ताचो गळो चिरून खून केल्लो. हो खून कोणें केला हें स्पश्ट जावंक ना. पूण यादव कुटुंबाचो दुबाव सत्यप्रकाश दुबे हांचेर आसा. प्रेम यादव आनी सत्य प्रकाश दुबे हांचे मदीं जमनी वयल्यान वाद सुरू आशिल्लो.
यादव हे दुबे हांच्या घरा आयले तेन्ना तांचे मदीं वाद आनी मारामारी जाली. हातूंत प्रेम यादव हाचो खून जालो. कांय वेळान प्रेम यादवाच्या लोकांनी सत्यप्रकाश दुबे हांच्या घराचेर हल्लो केलो. प्रेम यादवाची कूड सांपडले उपरांत ताचे कुटुंबीय आनी सोयरे बरेच तिडकले. २०- २५ लोक हातांत दांडे, बंदुको आनी चाकू घेवन सत्य प्रकाश हांच्या घरा पावले.
हें दृश्य पळयल्ल्या एकान दिल्ले म्हायती प्रमाण, तिडकल्ले लोक येतात तें पळोवन सत्य प्रकाश हांणी घराचें दार बंद केलें. सकाळची वेळ आशिल्ल्यान चडशे लोक न्हिदिल्ले. प्रेम यादव हांच्या कुटुंबीयांनी दार तोडून सत्य प्रकाश हांच्या घरांत प्रवेश केलो. उपरांत तांणी प्रत्येकाची हत्त्या करपाक सुरवात केली. सत्य प्रकाश हांच्या घराचेर हल्लो जालो तेन्ना ६ जाण आशिल्ले. हल्लेखोरांनी पुराय कुटुंबाची हत्त्या केली. ८ पिरायेचो चलो गंभीर जखमी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
