भांगरभूंय | प्रतिनिधी
-एनएसयूआय संघटणेच्या शिश्टमंडळान भेटयले राज्यपालांक निवेदन
पणजीः अभियांत्रिकी, वैद्यकशास्त्र आनी कायद्याच्या विद्यार्थ्यांनी बरयिल्ल्या उत्तरपत्रिकांची मुल्यमापन करपाची प्रक्रिया कायम दवरची, अशी मागणी एनएसयूआयन केल्या. बिरेस्तारा संघटणेच्या शिश्टमंडळान राज्यपाल पी. एस. श्रीधरन पिल्लई हांची घेट घेवन हे विशीं निवेदन भेटयलें. ह्या वेळार नौशाद नौशाद चौधरी, शेन रेबेलो, फाकृद्दिन मुजावर हाजीर आशिल्ले.
गोंय विद्यापिठाच्या अध्यादेश ‘ओए-25’ प्रमाण विद्यार्थ्यांक उत्तरपत्रिका मुल्यांकन करपाक येता. ताका लागून ग्रेडींग दितना कितें चुको जाल्यार वा विसंगती आशिल्ल्याचो दुबाव आयल्यार विद्यार्थी ह्या अध्यादेशाचो वापर करतात. ताका लागून तांकां उत्तरपत्रिका वा मेळिल्ले ग्रेड विशीं खातरजमा करपाक मेळटा. विद्यार्थ्यां खातीर हें मुल्यमापन करपाचें एक म्हत्वाचें साधन आसा.
पूण सध्या विद्यापिठान हो अध्यादेश फाटीं घेवपाचो प्रस्ताव संमत करून मंजुरी खातीर राज्यपालां कडेन धाडला. अध्यादेश फाटीं घेतलो जाल्यार जायत्या विद्यार्थ्यांचे लुकसाण जातलें. ताका लागून आमी राज्यपालांची भेट घेवन हो अध्यादेश रद्द करपाची संमती दिवची न्हय, अशी विनवणी केल्या. तशेंच मुल्यमापन शुल्क प्रति पेपर 5 हजार रुपया वयल्यान 12,00 ते 15,00 रुपया करचें, अशी लेगीत विनवणी केल्या.
ज्या अभ्यासक्रमांत दोट्टी मुल्यमापन करतात, थंय दोन मुल्यमापनांची सरासरी काडपा परस विद्यार्थ्यांन मेळयिल्ले सर्वोच्च गूण विचारांत घेवप गरजेचें. परिक्षांचेर विद्यार्थ्यांचो फुडार निंबून आसता. ताका लागून आमच्यो मागण्यो मान्य जाल्यो नात, जाल्यार आमी हो मुद्दो दरेक कॉलेजींत मांडून जनजागृताय करतले, अशें चौधरी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
