भांगरभूंय | प्रतिनिधी
भायर काडपाक उणेच तीन दीस लागूं येतात
सिलकारा, खबरां संस्था : उत्तराखंडांतल्या उत्तरकाशींत आयतारा दिवाळे दिसा दुर्घटना घडली. रस्तो बांदकाम चालू आशिल्लो बोगदो कोसळ्ळा. सुमार 36 कामगार ह्या कोळशा खाला आडकून पडल्यात. तांचे विशीं अजून फुडली खबर कळूंक ना.
सिलकारा आनी दंडलगांव हांचे मदीं ब्रह्मकमल आनी यमुनोत्री राश्ट्रीय म्हामार्गाचेर हो बोगदो बांदतात. सध्या बोगद्या भितर ऑक्सिजन धाडपाचें काम चालू आसा.
आयतारा फातोडेर चार वरांचेर ही दुर्घटना जाली. हो बोगदो 4 किमी. लांब आसा. बांदकामा खाला आशिल्ल्या बोगद्याचो 150 मीटर लांबायेचो भाग कोसळ्ळो. कामगारांक भायर काडपाक दोन ते तीन दीस लागूं येतात असो अधिकाऱ्यांचो अदमास आसा. कोसळिल्लो कोळसो काडपा खातीर ड्रिलींग मशीनांनी काम चालू केलां.
बोगदो कोसळपाची म्हायती मेळ्ळ्या उपरांत उत्तरकाशीचे एसपी अर्पण यदुवंशी रोखडेंच थंय पावले आनी तांणी मदत कार्य सुरू केलें. एनडीआरएफ, एसडीआरएफ, उजो पालोवपी दळ, नॅशनल हायवे आनी इन्फ्रास्ट्रक्चर डेव्हलपमेंट कॉर्पोरेशन लिमिटेडचेय कर्मचारी थंय पावल्यात.
चार धाम रस्तो प्रकल्पा खाला हो बोगदो बांदपाचो आसा. ताचे बांदकामा उपरांत उत्तरकाशी ते यमुनोत्री धाम मेरेनचें अंतर 26 किमी उणें जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
