भांगरभूंय | प्रतिनिधी
‘नॅशनल इन्स्टिट्यूशनल रँकिंग फ्रेमवर्क’न क्रमवारी केली जाहीर
नवी दिल्ली, खबरां संस्था ः ‘नॅशनल इन्स्टिट्यूशनल रँकिंग फ्रेमवर्क’न जाहीर केल्ल्या 2024 वर्साच्या क्रमवारीच्या णव्या आवृत्तींत गोंय विद्यापीठ पयल्या 100 क्रमांकांतल्यान परतून फाटीं उरला. 2022 आनी 2023 वर्सा विद्यापीठ 101 वयल्यान 150 ‘बँड’ मेरेन देंवलो. 2024 वर्साय परतून अशें जाल्ल्याची म्हायती मेळ्ळ्या. गोंय विद्यापीठ सेगीत तिसऱ्या वर्सा पयल्या 100 मदीं पावपाक अपेशी थारला. देशांतले टॉप विद्यापीठ, म्हाविद्यालयां, अभियांत्रिकी, वेवस्थापन आनी फार्मसी ह्या मळार पयल्या उच्च शिक्षण संस्थांक क्रमांक दिवपा खातीर केंद्रीय शिक्षण मंत्रालयान 2015 वर्सा सावन नॅशनल इन्स्टिट्यूशनल रँकिंग फ्रेमवर्क पद्दत आपणायल्या. ह्या ‘रॅंकिंग फ्रेमवर्कान’ जाहीर केल्ल्या 2024 वर्साच्या क्रमवारीच्या णव्या आवृत्तींत ‘आयआयटी मद्रास’ देशांतली सगळ्यांत सर्वोत्तम उच्च शिक्षण संस्था थारली.
सेगीत तिसऱ्या वर्सा गोंय विद्यापिठाक देशांतल्या उत्कृश्ट शंबर विद्यापिठांच्या वळेरेंत सुवात मेळूंक ना. देशांतल्या 58 हजार उच्च शिक्षण संस्थांतल्यान अंदूं 6,517 शिक्षणीक संस्थांनी क्रमवारी सर्तींत वांटो घेतिल्लो. वेगवेगळ्या वर्गां खातीर वट्ट 10,845 अर्ज केल्लें.
मजगतीं, केंद्रीय शिक्षण मंत्री धर्मेंद्र प्रधान हांच्या हाजिरेंत उच्च शिक्षण संस्थांची क्रमवारी जाहीर जाली. ‘एनआयआरएफ’च्या णव्या आवृत्तींत राज्य विद्यापीठ, उक्ते विद्यापीठ, कुशळटाय विद्यापीठ अशे तीन नवे वर्ग जोडल्यात आनी जाहीर केल्ल्या 2024 वर्साच्या क्रमवारीच्या णव्या आवृत्तींत ‘आयआयटी मद्रास’ देशांतली सगळ्यांत बरी उच्च शिक्षण संस्था थारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
