भांगरभूंय | प्रतिनिधी
मडगांव : कोकण रेल्वे मार्गाचेर साश्टीच्या- उतोड्डा वाठारांतल्या रेल्वे रुळा लागसारा एके बायलेची कूड सांपडली. कोकण रेल्वे पुलिसांनी हाची असैमीक मरण म्हणून नोंद केल्या. पुलिसांचे चवकशेंत मारिया दुरादो अशे बायलेचें नांव आशिल्ल्याचें समजलां.
मेळिल्ले म्हायती प्रमाण, शुक्रारा सकाळीं कोकण रेल्वे पुलिसांक इगर्जे लागसारच्या रेल्वे रुळा कडेन एक कूड आशिल्ल्याची म्हायती मेळ्ळी. पुलीस रोखडेच घडणुके सुवातेर पावले तेन्ना तांकां एके बायलेची कूड सांपडली. रेल्वेचो धपको लागिल्ल्यान तिका मरण आयिल्ल्याचें समजलें. पंचनामो करून तिची कूड दक्षीण गोंय जिल्लो हॉस्पिटलांतल्या पोस्टमार्टमांत धाडली. कोकण रेल्वे पुलिसांनी थळाव्या नागरिकां कडेन केल्ले चवकशी उपरांत हे बायलेचें नांव मारिया फातिमा दुरादो (५९) आनी ती उतोड्डेंच्या ग्रॅब्रियल क्रुझवाड्यार रावता अशी म्हायती मेळ्ळी. हे विशीं पुलीस निरीक्षक सुनील गुडलर हांच्या मार्गदर्शना खाला फुडलो तपास सुरू आसा.
मजगतीं, दोन दिसां आदींच मडगांव रेल्वेस्टेशना पसून कांय अंतराचेर माडेल फातोड्डेंचो २१ वर्सां पिरायेचो जेरीको दा कोस्ता हाची कूड रुळा कुशीक मेळिल्ली. ह्या प्रकरणांतूय पुलिसांनी असैमीक मरण म्हणून नोंद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
