भांगरभूंय | प्रतिनिधी
वास्कोः उतोड्डें बायपास- वेर्ण्यां एका मोटारीन स्कुटरीक धपको दिल्ल्यान जखमी जाल्ले सीताराम कारापूरकार (58 भटपावणी न्हयबाग पेडणें ) हांकां उपचारा वेळार मरण आयलें. गतीन आनी निश्काळजीपणान मोटार चलोवन मनशाच्या जिविताक धोको निर्माण केल्ले खातीर मोटार चालक प्रशांत गायकवाड (रायगड, महाराष्ट्र) हाचे आड पुलिसांनी गुन्यांव नोंद केला.
पुलिसांनी दिल्ले म्हायती प्रमाण प्रशांत गायकवाड हो तात्पुरतो नोंदणी क्रमांक मेळयिल्ली ( MH-14-TCM-605) स्कोडा क्लायक मोटार घेवन मडगांव सावन पणजे वटेन बुधवारा सांजवेळा स वरां मजगतीं वतालो. राष्ट्रीय म्हामार्ग 66 च्या उतोड्डें बायपास रस्त्या कुशीक अायले उपरांत ताचें मोटारी वेलें नियंत्रण सुटलें. ताका लागून मोटार चुकीचे दिशेन वचून अॅक्टिव्हा स्कुटरीक (GA-08-AK-1869 ) धपको दिलो. ह्या धपक्याक लागून स्कुटरचालक सीताराम कारापूरकार (पेडणें) आनी फाटल्यान बशिल्लो रवींद्र सिंग (झारखंड) हे गंभीर जखमी जाले.
तांकां उपचारा खातीर दक्षीण गोंय जिल्हो हॉस्पिटलांत दाखल केले. पूण थंय सीताराम कारापूरकार हांकां मरण आयलें.
ह्या प्रकरणाचो फुडलो तपास वेर्णेंचे पुलीस निरिक्षक मेलसन कुलासो हांच्या मार्गदर्शना खाला उपनिरिक्षक रामचंद्र एम. नायक करतात.
मजगतीं, सीताराम कारापूरकार हांचे कुडीचेर काल (बिरेस्तारा) दनपारां दोन वरांचेर भटपावणी न्हयबाग पेडणें मसुंडेंत निमाणे संस्कार केले. तांचे फाटल्यान घरकान्न सुरक्षा कारापूरकार आनी धूव श्रुतिका कारापूकार असो घराबो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
