भांगरभूंय | प्रतिनिधी
मडगांव: उतोड्डेंच्या ’जॅमिंग गोट’ ह्या नामनेच्या शॅकाक आयतारा सकाळीं उजो लागलो. वेर्णें आनी मडगांव उजो पालोवपी दळान बरेच यत्न करून उज्याचेर नियंत्रण मेळयलें. मात शॅकांत आशिल्ल्या सुमार १० लाखांच्या सामानाचें लुकसाण जालें. विशेश म्हळ्यार, फाटल्या सप्तकांतूच जिल्लो प्रशासनान ह्या शॅकचें बेकायदो बांदकाम काडपाचे निर्देश दिल्ले.
हे विशीं चड म्हायती प्रमाण, स्नेहा नरोन्हा हांच्या ह्या शॅकाक आयतारा सकाळीं सुमार पावणे पांच वरांचेर उजो लागलो. हे घडणुकेची म्हायती मेळटांच वेर्णा उजो पालोवपी दळाचे अधिकारी दिलेश गांवकार आनी तांचे वांगोडी घडणुके सुवातेर पावले. उज्याक नेट आशिल्ल्यान मडगांव उजो पालोवप दळाचोय बंब आपयलो. ह्या उज्या शॅकांतलीं मेजां, खुर्च्यो, लायटीच्यो व्हायरी, सोर्याचो सांठो आनी हेर सामान लासून गोबोर जालें. शॅकांत गॅस सिलिंडरूय आशिल्लो, मात हे घडणुकेंत कोणाक कांय जावंक ना. हो उजो शॉर्टसर्किटाक लागून लागिल्ल्याचो मुळावो अदमास आसा, तरी उज्याचें नेमकें कारण आजूनय स्पश्ट जावंक ना.
उजो पालोवपी दळान केल्ले चवकशेंत धक्को दिवपी म्हायती मुखार आयली. ह्या शॅकच्या बांधकामा खातीर उजो पालोवपी दळाचो कसलेच तरेचो परवानो घेवंक नाशिल्लो, तशेंच उज्याचेर नियंत्रण मेळोवपा खातीर थंय खंयच यंत्रणां उपलब्ध नाशिल्ली. मजगतीं, ’गोंय दर्यादेग वाठार वेवस्थापन प्राधिकरणा’न केल्ले पळोवणेंत ह्या शॅकाचें बांदकाम बेकायदो मेळ्ळें. हे फाटभूंयेर दक्षीण गोंय जिल्लो प्रशासनान कारवायेचें निर्देश दिल्ल्यान, सोमारा सकाळीं हें बेकायदो बांदकाम उडयतले अशी म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
