भांगरभूंय | प्रतिनिधी
कलाकार
एका तेंपार आपल्या अभिनय आनी सौंदर्यान सिनेमांसृश्टींत शेक गाजोवपी अभिनेत्री लीना चंदावरकर. तिचो जल्म कर्नाटकांतल्या धारवाडा कोंकणीभाशक कुटुंबांत 29 ऑगस्ट 1950 दिसा जालो. तिचो बापूय लश्करी अधिकारी श्रीनाथ चंदावरकर. लीना ही अभिनेतो-गायक किशोर कुमाराली बायल. पडद्याचेर अल्लड पात्रां केळोवपी लीनालें जिवित मात उतार- चडावांनी भरिल्लें आसा. तिणें फक्त 30 चित्रपटांनी अभिनय केला.
चित्रपटांत काम करतना 1975 वर्सा गोंयचे पयले मुख्यमंत्री सर्गेस्त दयानंद बांदोडकार हांचे पूत सिद्धार्था वांगडा लीनाचें लग्न जाल्लें. पूण लग्नाच्या 11 व्या दिसा सिद्धार्थाक चुकून पिस्तुलाची गुळी लागली आनी फुडें उपचारा मजगतीं ताका मरण आयलें. पिरायेच्या 25 व्या वर्सा लीना विधवा जाली. उपरांत लीना डिप्रेशनांत गेल्लें. कांय तेंपान लीनान परतून सिनेमांत काम करपाचें थारायलें. ह्या काळांत किशोरकुमाराची भेट जाली. फुडें भेटीचें मोगांत रुपांतर जालें. पाच वर्सा उपरांत 1980 त आपले परस 22 वर्सांनी व्हड आशिल्ले आनी तीन फावटीं लग्न जाल्ले लोकप्रीय गायक, अभिनेते किशोर कुमार हांचे वांगडा तिणें लग्न केलें. लीनाच्या बापायक हें नातें सुरवेक मान्य नाशिल्लें. फुडें किशोर आनी लीनाक सुमित हो चलो. लग्न जावन सात वर्सां उपरांत म्हळ्यार 1987 वर्सा किशोर कुमार काळजाच्या आताकान भायर पडले आनी परतून एक फावट लीनाक वैधव्य आयलें.
ल्हानपणा सावन लीनालें सिने अभिनेत्री जावपाचें सपन आशिल्लें. शाळेंत शिक्षिकेन व्हड जातकच कोण जावपाची इत्सा आसा, ह्या विशयाचेर एक निबंद बरोवपाक सांगिल्लो. ताचेर लीनान म्हाका सिनेमा अभिनेत्री जावपाची इत्सा आसा अशें बरयिल्लो निबंद वाचून तिडकल्ल्या शिक्षिकेन लीनाक मार घाल्लो. कारण ते तेंपार चलयांनी चित्रपट मळार पदार्पण करप हें सुसंस्कृत माननाशिल्लें. आवय- बापायलो लेगीत लीनान सिनेमांत काम करपाक खर विरोध आशिल्लो. सिने अभिनेत्री जावपाच्या हट्टाक लागून लीनान एका टॅलेंट हंटांत वांटो घेतलो आनी तातूंन तें वेचून आयलें. पूण मुंबय आयले उपरांत तें पिरायनेन ल्हान म्हूण ताका काम दिवंक ना.
कालांतरान लीनाक सुनील दत्त आनी नरगिस हांणी 1969 वर्सा ‘मन का मीत’ सिनेमांत फकत 19 वर्सां पिरायेर ल्हानशी भुमिका करपाची संद दिली. तांणीच तिका मुखार हाडली. 1971 त आयिल्लो “मेहबूब की मेहंदी” सिनेमांत लीनान राजेश खन्ना वांगडा काम केलें. हो सिनेमा सुपरहिट जालो आनी लीना रातयां स्टार जाली. मुखार लीनाक संद मेळत गेली. 1976 वर्सा ‘बैराग’ सिनेमांत तिणें दिलीप कुमार आनी सायरा बानु, प्रेम चोपडा आनी हेलन हांचे वांगडा अभिनय केल्लो. तिचे आनीक कांय सिनेमा सांगपाचे जाल्यार ममता की छांव मे, कैद, एक महल हो सपनों का, अपने रंग हजार, मनचली, इमान, मैं सुंदर हूँ,
हेमा मालिनी आनी मुमताज हांचे वांगडा 70 च्या सुमाराक ती एक मुखेल नायिका आशिल्ली. लीना सद्या पूत सुमीत कुमार, सावत्र पूत गायक अमित कुमार, ताची घरकान्न, धूव हांचे वांगडा मुंबय रावता.
_______
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
