भांगरभूंय | प्रतिनिधी
कसलो हुस्को जाला? विरोधी पक्ष मुखेली म्हणून ते आपणाक विसरतात तेन्ना तांचेच न्हय पक्षांतल्या अस्तुरी खासदारांचे दोळे, चेहरे भिरांकुळ जातात.
कालचें भुरगें एसी रुमांत जल्माक आयलें ना, आयज येता नदरेंत थिराय घेवन. थिरायेक, चेहऱ्याक, दोळ्यांक उतरां परस राजकारणांतय म्हत्व येवंक लागलां. दोळ्यांत दुकांय वखदान काडूंक येतात, अडेचें हांशेंय हाडूंक येता. वेंचणूक लागीं येता तेन्ना नाटकांय जातात. शेणिल्लें, लिपिल्लें धांवून येतात, कितें आसता तांची मोख? दुसऱ्यांचे बरें करपाची? आपसुवार्थाची?
देशा पासत वावुरतना आदले प्रधानमंत्री राजीव गांधी अचकीत गेले, आवय इंदिरा गांधींवरी. दोगांयचीं मुखांमळां आयजय ताज्जीं दिसतात. राजीवजींचें गोंय नौदळाच्या विमानतळार फांतोडेर पत्रकारांक मेळप आयजय याद येता. राजीवजींचे हांशें खासदार राहुल गांधी हांच्या तोंडार कांय वर्सांआदीं ते गोंय विद्यापीठांत आयिल्ले तेन्ना दिशील्लें. प्रधानमंत्री नरेंद्र मोदी हांचे बराबरीन लोकसभेचे सभापती ओम बिर्ला हांकां सभापतीचे कदेलार बसयतना तेंच हांशें राहुल हांच्या तोंडार आशिल्लें. कित्याक शेणटा तें आतां? कसलो हुस्को जाला? विरोधी पक्ष मुखेली म्हणून ते आपणाक विसरतात तेन्ना तांचेच न्हय पक्षांतल्या अस्तुरी खासदारांचे दोळे, चेहरे भिरांकुळ जातात. तांकां आतां लोकसभेच्या सभापतींनी तांचे बराबरीन बसून शिकोवचें पडटलें. ती तांक श्री. बिर्ला हांकां आसा, ते दोळे मोठे करून, हात आपटून न्हय उतरांनी विरोधी खासदारांक तांच्यो चुको दाखोवन दितले.
आपली फाट थापटून घेनासतना ते जेन्ना उलयतले तेन्ना राहुल तांकां नमस्ते करतले हातूंत दुबाव ना. राहुल हांकां आपल्यो चुको कळूंक लागल्यात. एका तेंपार देशाचे आदले संरक्षणमंत्री मनोहर पर्रीकार गाडयेंत बशिल्ले कडेन तांचे मुखार मायक घेवन वचपी पत्रकारांक आडायतले तशेंच आयज राहुल करतात. राहुल हांच्या चेहऱ्याचेर गेल्ली सत्ता बेगीन कशी परत येतली तो हुस्को दिसपाक लागला. गेल्ली सत्ता मेळोवपाक वर्सांची वर्सां देशाच्या कोनशांनी भोंवचें पडटलें.
अणभवी राजकारण्यांक आयज संवसाराच्या कोनशाक गेल्यार शेणिल्ली सत्ता परत मेळोवपाची वाट दिसतली अशें न्हय. अणभव नासल्यार, सत समजून न घेतल्यार आशिल्ले कार्यकर्ते, खासदार शेणपाची भिरांत आसा. सत समजून घेवपाक चड फाटीं वचपाची गरज ना, वीस- पंचवीस वर्सांआदीं कितें केलें ताचो अभ्यास करप बरें. राहुल हांकां आय टी वेगीं धांवता तें कळपाक लागलां. चुको वेळार कळ्ळ्यार अचूक सत होलमतलें, उपाय बेगीन जातले? सुदारपाक वगत लागतलो. कालचेच दीस परत येतले अशें न्हय, ताचेपरस बरे दिसूय येवंक शकतात, तेखातीर विचारमंथन करचें पडटा, कश्ट आसतात. उतरां आनी चेहऱ्याक म्हत्व येता.
पणजी म्हापालिकेच्या वेंचणुकेंत राजकी पक्ष वेगळे वाटेर वतले अशें दिसूंक लागलां. पणजी गोंयचें राजपाटण, राजपाटणांत सचिवालय, मंत्रालय आसता. गोंयचे राजपाटण आशिल्लें आदिलशहाच्या राजवाड्यांत, पुर्तुगीजांच्या दायजाचें ते चिन्न. कितलो तेंप सांबाळप आदिलशहाचो राजवाडो?आदले मुख्यमंत्री प्रतापसिंह राणे हांकां अभ्यासांतल्यान तें होलमल्लें. श्री. राणे हे गोंयच्या फुडाराचे शिल्पी, उंचेल्या शिक्षणाची बुन्याद तांणी घाली. श्री. राणे पुर्तुगीजांआड झुजिल्ल्या दिपाजी राणेंच्या घराब्यांतले. तांच्या आदर्शांतल्यान गोंय भाजपाचें फुडारपण घडलें. श्री. राणे हांच्या विचारांतल्यान फुडें वतना सत्तरीचे खाशे समाजीक बदलाचे शिल्पकार हें विसरुंक फावना. राजभास कोंकणी आनी गोंयांक राज पावंडो तांच्या सरकाराच्या तेंपार मेळ्ळो. मराठी परस इंग्लेज, राजभास कोंकणीक ते म्हत्व दिवंक लागले. मुख्यमंत्रीच न्हय विरोधी पक्ष मुखेली म्हणूनय तांचें कार्य मोलादीक. आपूण एक शेतकामती अशें ते विधानसभेंत सांगपी.
गोंय राज्य जातना आदिलशहाच्या राजवाड्याक, सुविधांक वेंरो वतात, विधानसभा व्हड जाता, राज्याक थिराय मेळपाक जाय हें तांकां दिसलें. तातूंतल्यान पर्वरेंतली सरकारी भूंय राखपापासत नवे विधानसभेची बुन्याद श्री. राणे हांणी पर्वरे घाली. तांच्या उपरांत पर्वरे सचिवालय, मंत्रालय बांदपाचें व्हड कामकाज तांच्याच मार्गदर्शनातल्यान पयलींचे मुख्यमंत्री पर्रीकार हांणी केलां.
कितें आसा राजपाटण पणजेंत? पणजेकारय शिंपडल्यात, पुराय गोंयांत. राजपाटणाचें वैभव मांडवी न्हंय, मांडवीचे देगे वयली कला अकादमी, हालींचें परशुराम थळ, कांपाल वॉकवे. विखुरील्ले, इबाडिल्ले पणजेक भायर काडटना स्मार्ट पाटो प्लाझा जालो, दायजांतली म्युझियम इमारत उदकांत बुडपाक लागली. पणजेंत आठ बारा मजल्यांच्यो बिल्डिंगो नाकात हें धोरण आपणावपी श्री. राणे पणजेकार विसरतले? टावन अँड कंट्री प्लॅनिंग खात्याचे मंत्री म्हणून श्री. राणे हांणी घालून दिल्ल्या तत्वांचेर सरकारान चलपाचो वगत आयला. कळ्ळ्या आसत कांय ती तत्वां पूत नगर विकासमंत्री विश्वजीत राणे हांकां? भेस बदलतना ज्युनियर राणेंची चलपाची, उलोवपाची स्टायल बदलल्या, पणजे वेंचणुकेंतल्यान आनीक बदलतली. पणजी म्हापालिका वेंचणुकेंत तांकां, तांच्या उतराक म्हत्व आसा. तांच्या आज्या पणज्याचें दायजांतले घर मुख्यमंत्र्यांच्या मतदारसंघांतलें. मतदार नासले तरी तांचेंय घर पणजेंत आसा. गोंयांत मोन्यांनी बदल हाडपांत ते मुखार सरतात तेन्ना तांकां विरोध जाता. तो विरोधा खातीर न्हय गोंयच्या बऱ्या खातीर. पिराय वाडटना उतरां, चेहऱ्याचें राजकारणांतलें म्हत्व सांगपा समजुपा इतलें गिन्यान तांकां आसा. कुळणातल्या ल्हानशा आल्मारीतलीं पुस्तकां तांकां पणजेच्या इतिहासाच्यो यादी सांगतलीं. तशी पणजी तांकां आनी उत्पल पर्रीकार हांकां नवी न्हय. आसत दोगांचे इश्ट वेगळे, पणजे भायले पणजेकार तांचे दुस्मान नासतले.
पणजी म्हापालिका वेंचणूक लागीं येतना राजकारण तापतलें, उजो पेटचोना हाची जतनाय राजकी पक्षांनी घेवन बरी. बर्च बाय रोमिओ क्लबाक उजो लागल्या उपरांत व्हड, आधुनिक जाल्लें उजो पालोवपी दळ सादूर जालां. गिमाळे दीस लागीं येतना न्हीद खळची न्हय हे खातीर उजो पालोवपी दळाक घटाय मेळपाक जाय.
उतरां, चेऱ्याक राजकारणात म्हत्व येतना राजकी नेतृत्वाक नवे नदरेन पळोवचें पडटलें. आपलो, विरोधी वांगड्यांचो चेरो, आंगलोटाकडेन. संसद, असंसदीय भासेच्या उतरांकोशाची बांदावळ तातूंतल्यान जावची. उतरांवांगडा चेरो, दोळे, हात, बोटां म्हत्वाचीं जातात तेन्ना तांचो उपेग कसो करचो तें शिकपाची, गरज दिसूंक लागल्या. उतराक उतर लागतना चेहऱ्याचो फातर जाता, कपलार गुंडो बसता. तो काडून पयस शेंवटून उडोवपी, मनीसपण दाखोवपी राजकारणी पणजेक जाय.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
