उतरांचो खेळ

भांगरभूंय | प्रतिनिधी

आयज जायते जाण लोकप्रतिनिधींचे कार्यकर्ते जावपाक कित्याक धडपडटात, ताची जापूय हे घडणुकेन मेळटा.

वीज खात्याच्या खांब्यांक बेकायदेशीर पद्दतीन बांदिल्ले केबल कापपाची कारवाय केल्ले खातीर उजवाडांत आयिल्ले कार्यकारी अभियंते काशिनाथ शेट्ये आयज परतून एकदां वादग्रस्त थारले. कारण जालें बोगदा वास्कोची घडणूक. थंय आमदार संकल्प आमोणकार हेवूय आयिल्ले. तांणी वीज खात्याच्या अधिकाऱ्यांक, कामगारांक दुरीग बांदपाक दिवंक ना, केबल काडपाकूय दिवंक ना, असो आरोप जाला. घडणूक थळाचेर आमदार आनी अभियंत्यां मदीं जाल्लो उतरांचो खेळ पुराय गोंयकारांनी पळयलो. ताचो व्हिडियोय व्हायरल जाला. आपूण फक्त वरिश्ठांचो आदेश पाळटालों, अशें वीज अभियंतो म्हणटा, जाल्यार ही परंपरीक वाट बंद करपाक दिवचे नात, अशें आमदाराचो निर्धार. आतां मेरेन हें प्रकरण पुलिशेंत गेलांय आसतलें. कारण अभियंते शेट्ये हांणी सरकारी कामांत आडमेळीं हाडप्यां आड कागाळ करतले अशें सांगलां.
अभियंते शेट्ये सांगतात ते प्रमाण, ‘बोगदा वाठारांत बार आसा, थंय कांय घरांय आसात. थोडीं बेकायदेशीर. थंय वचपाक चार वाटो आसात. ह्या जाग्यार खात्याचे केबल आनी हेर सामान आसा. हांगाच्यान बार आनी घरांनी बेगीन वचपाक मेळचें म्हूण दुरीग मोडून दोन वाटो केल्यात. थंय कांय बेबदे येतात, मस्ती करतात. कोण तरी येवन केबल चोरून व्हरतात. देखून तें दुरीग बांदपाक, केबल व्हरपाक आमी आयिल्ले. पूण आमकां कांय लोकांनी आडायले. सरकारी कामांत हस्तक्षेप केलो. म्हूण पुलीस मागयले. उपरांत आमदारूय आयलो…’ आनी मागीर व्हिडियोंत पळोवपाक मेळटा तो वाद. चार वाटां मदल्यो दोन वीज खातें बंद करपाक सोदता. हाचो परिणाम लोकांचेर जावचो ना, कारण थंय वचपाक हेर दोन वाटो आसात, असो अभियंत्यांचो दावो. तर आमदार म्हणटा, आपणे विधानसभेंत हाचेर आवाज काडिल्लो. ही परंपरीक वाट बंद करपाक दिवचो ना. सरकारानूय आमकां तशें आस्वासन दिलां. हांगाचे केबल व्हरपाक आपणें दोन वर्सां पयलीं सांगिल्लें. तशें पत्रूय बरयिल्लें, पूण वीज खात्यान आळस केलो, अशेंय आमदाराचें म्हणणें. खातें कितें करता, असो प्रस्नूय तांणी केलो. हाचेर खरें म्हणल्यार वीज मंत्र्यान स्पश्टीकरण दिवंक जाय आसलें. कारण सरकारी अधिकाऱ्यांक लोकप्रतिनिधी आडावपाक लागले जाल्यार कोणूच कसलेंच काम करपाक मुखार सरचे नात आनी मागीर सगलेच जाण मनाक येता तशे वागतले. वीज खात्याचें दुरीग केन्ना मोडिल्लें, ती परंपरीक वाट कितल्या वर्सां सावन आसा, हेंवूय लोकांक कळपाक जाय. कारण हालीं परंपरीक वाटांचो वाद दरेका गांवांत रंगता.
देवा- धर्माची वाट म्हूण कांय जाण वाटेर हक्क सांगतात, तर थोडे वाटेर पुतळे बी उबे करून आडमेळीं उबीं करतात. धर्मीक संस्थानांचे जागे हालींच्या वर्सांनी गेट, दुरीग बी बांदून बंद केल्ले दिसतात. कारण बेकायदेशीर प्रवेश. थोड्यांनी लोकांक वाटो सोडल्यात. पूण थंय रातच्या वेळार सोरो पिवप, खेळपाक बसप असले प्रकार जातात. म्हणटकच देवस्थानान वा कोणा भाटकारान गेट बंद करून भितर येवपाक मनाय केली जाल्यार तांकां दोश दिवपाक मेळचो ना. दुसरे वटेन जाग्यांक मोल आयिल्ल्यान परंपरीक वाटो, धर्मीक कार्य करपाचे जागे पसून जमीन धनयांनी विकल्यात. नव्या धनयान थंय दुरीग बांदतकच मागीर वाद. तशे लोकां खातीर वाट सोडपी, जागे पसून दिवपी लोक आसात. पूण, कोणेच बेकायदेशीर कामां करपाक जायनात. लोकप्रतिनिधींनूय तांकां आशिर्वाद दिवंक फावना. बेकायदेशीर काॅलनीय कांय कडेन उब्यो जाल्यात. उपरांत त्यो मोडूनय उडयल्यात. सगलो दोश बेकायदेशीर जागो विकत घेवन घर बांदप्याक. पयशे खावन गायब जालो ताचे हात सुके पांय सुके.
बोगदा वीज खात्याच्या ह्या जाग्यार लायटीचें सामान, केबल चोरयेक वतात असो आरोप जालो. थंय राखपाक कोण दवरुंक ना? हाचे पयलींय राज्यांत असले प्रकार जाल्यात. केबलाचीं व्हडलीं रिलां पसून चोरल्यात. बोगदा घडणुकेच्या व्हिडियोंचेर सोशल मिडियाचेर 95 टक्के लोकांनी वीज अभियंत्यांची बाजू घेतल्या. ताणें वरिश्ठांचो आदेश पाळपाक जाय आशिल्लो. लोकप्रतिनिधीक सर, सायब कित्याक म्हणटा, तुका तुजें काम कळना, असो प्रस्नूय कांय जाणांनी विचारला. सरकारी अधिकाऱ्यान ड्युटी करूंक वतना व्हिडियो काडप, हें बरोबर काय चुकीचें? पूण एके नदरेन तें बरें. कोण कितें उलयला, करता तें पळोवप्याक कळटा. व्हिडियोक लागून हें प्रकरण वरिश्ठ पांवड्याचेर पावलां. आतां अभियंत्याच्या हातांतलें काम काडून घेतात, काय ताची बदली करतात, तें दिसतलेंच. दरेका राज्यांत कायद्यान चलपी अधिकारी आसतात, मात तांकां मनस्ताप सोंसचो पडटा, मागीर ते बेकायदेशीर कामां कडेन आडनदर करतात. आयज जायते जाण लोकप्रतिनिधींचे कार्यकर्ते जावपाक कित्याक सोदतात, ताची जापूय हे घडणुकेन दिल्या. लोकप्रतिनिधींनूय हाचेर विचार करपाक जाय. बेकायदेशीर गजाल आसल्यार तांणी तेंको दिवंक फावना. दिल्यार सगलेच कडेन अंदाधुंदी वाडटली.