भांगरभूंय | प्रतिनिधी
पणजी ः अन्न आनी वखदां प्रशासन संचालनालयाच्या अन्न सुरक्षा अधिकाऱ्यांनी अन्न सुरक्षा आनी मानक कायद्या खाला उण्या दर्ज्याचो शेव, चिवडो, काजू आनी पालक चक्री उत्पादक आनी विक्रेत्यां आड कारवाय केली. ह्या प्रकरणांत उत्तर गोंय अतिरिक्त जिल्होन्यादंडाधिकारी आनी न्याय अधिकाऱ्यान निवाडो दितना अन्न सुरक्षा आनी मानक कायद्याचे उल्लंघन केल्ले खातीर उत्पादक आनी विक्रेत्यांक दंड भरपाचो आदेश दिला.
उण्या दर्ज्याचो आनी सिंथेटीक कलर वापरून तयार केल्लो मिक्स शेव, चिवडो उत्पादन आनी विक्री केल्ले खातीर दामाजी के. म्हावळणकार (उत्पादक) आनी मे. महावीर बालाजी स्विट मार्ट, आल्त पर्वरी हांका एक लाख रूपया दंड भरपाचो आदेश दिलां. लेलेस काजू नांवान उण्या दर्ज्याचे काजू उत्पादन आनी विक्री केल्ले खातीर प्रकाश मे. गोवा काजू डेपोचे धनी प्रकाश बिश्णोय आनी जयराम बिश्णोय, उमतावाडो कळंगूट हांका दोन लाख रूपया दंड भरपाचो आदेश दिलां.
तशेंच दुसऱ्या एका कारवायेच्या प्रकरणांत उण्या दर्ज्याची पालक चक्री उत्पादन आनी विक्री केल्ले खातीर मे. जननी फुड प्रॉडक्टस, कुंद्रापूर उडपी, कर्नाटक हांका 20,000 रूपया, जाल्यार प्रभू ट्रेडर्स, बांबोळे आनी मुकेश राजपुरोहित ओम साई जनरल स्टोअर, ताळगांव हांकां दरेकी 10,000 रूपया दंड भरपाचो आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
