भांगरभूंय | प्रतिनिधी
अदानी समुहाचें कोळसो आयात प्रकरण
नवी दिल्ली, खबरां संस्था ः अदानी कंपनी समुहा कडेन संबंदीत कोळसो आयात प्रकरणाची चवकशी परतून सुरू करपा खातीर महसूल गुप्तचर संचालनालयान (डीआरआय) सर्वोच्च न्यायालयांतल्यान परवानगी मागल्या. सिंगापूरांतल्यान ह्या प्रकरणा संबंदीत पुरावे एकठांय करपाची परवानगी दिवची अशें डीआरआयन सांगलें. अमेरिकन खबरां एजन्सी रॉयटर्स कंपनीन आपल्या एका अहवालांत हे विशीं म्हायती दिल्या.
अहवाला प्रमाण, तपास यंत्रणा 2016 सावन सिंगापूरच्या अधिकाऱ्यां कडल्यान अदानी समुहाच्या वेव्हारा संबंदीत कागदपत्रां मेळोवपाक सोदता. सिंगापूरच्या अदानी ग्लोबल पीटीई वरवीं इंडोनेशियन पुरवणदाराकडल्यान आयात केल्ल्या कोळशाच्या जायत्या म्हालां खातीर ह्या पंगडाक चड बिल मेळ्ळें असो डीआरआयचो विस्वास आसा. सिंगापूर आनी भारतांत कायदेशीर प्रक्रिया वरवीं ह्या प्रकरणा संबंदीत कागदपत्रां आडावपाक गौतम अदानी हांच्या कंपनींक येस मेळ्ळां अशें न्यायालयाच्या कागदपत्रांतल्यान दिसून येता.
प्रकरण कितें?
फायनान्शियल टाइम्सान एका अहवालांत, अदानी समुहान इंडोनेशियांतल्यान उण्या दरान कोळसो आयात केलो आनी बिलांत ताचो चड दर दाखयलो. ताका लागून ह्या पंगडान कोळशांतल्यान तयार जाल्ली वीज चड दरान गिरायकांक विकली. 2019 ते 2021 ह्या काळांत 32 म्हयन्यांत इंडोनेशियांतल्यान भारतांत अदानी समुहा वरवीं आयात केल्ल्या कोळशाच्या 30 म्हालांची तपासणी केल्या. ह्या सगळ्या म्हालाची आयात नोंदींत निर्यात घोशणापत्रा परस चड दर आशिल्ल्याचें दिसून आयलें. आयात करतना एकत्रीत म्हालाचे मोल 70 दशलक्ष (सुमार ₹ 582 कोटी) वयर वाडले.
डीआरआयन चवकशी सुरू केल्ली
खबरां प्रमाण डीआरआयन 2014 वर्सा ह्या प्रकरणाची चवकशी सुरू केल्ली, तातूंत 40 कंपनींचो आस्पाव आशिल्लो. इंडोनेशियन कोळसो आयात करपी कंपनींनी मध्यस्थांनी सिंगापूर सयत हेर सुवातींनी धाडिल्लीं शिपमेंट बिलां दाखोवन डिलिव्हरीचेर चड शुल्क घेतात असो आरोप तपास संस्थेन केल्लो.
तपास अधिकाऱ्यांनी अदानी गट कंपनींच्या 1300 म्हालांचो नियाळ घेतलो आनी इंडोनेशियांतल्यान निर्यातीचे तुळेंत आयात करतना कोळशाचे दर वाडयले असो आरोप केलो. देशांत म्हारग दरांत वीज विकून पयशे मेळोवपाचो हाचो हेत आशिल्लो.
मुंबय उच्च न्यायालयान स्थगीत दिल्ली
अदानी समुहाच्या आव्हानाचेर मुंबय उच्च न्यायालयान 2019 वर्सा प्रक्रियात्मक दोश सांगून ताचे आड पुरावे एकठांय करपाची विनंती न्हयकारली. कांय दिसांनी संस्थेन सर्वोच्च न्यायालयांत अपील केलें तेन्ना सर्वोच्च न्यायालयान उच्च न्यायालयाच्या निर्णयाचेर स्थगिती दिवन चवकशी करपाक परवानगी दिली. हाचे उपरांत 2020 वर्सा अदानी समुहाच्या विनंती प्रमाण भारतांतल्या सर्वोच्च न्यायालयान निमाणो निर्णय घेवंक नाशिल्ल्यान संबंदीत कागदपत्रां अजून जाहीर करची न्हय अशें सिंगापूरच्या न्यायालयान सांगिल्लें.
अदानी समुहान सगळे आरोप न्हयकारल्यात
कोळशाच्या दरांतल्या घुस्पागोंदळाचे सगळे आरोप अदानी समुहान न्हयकारल्यात. फायनान्शियल टायम्साची ही खबर पोरन्या आनी अर्थहीण आरोपांचेर आदारीत आसा अशें तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
