भांगरभूंय | प्रतिनिधी
पणजी : येवपी विधानसभा वेंचणुकेंत हांव उमेदवारी दाखल करपाचों आशिल्ल्यान महापौर म्हणून काम करपा खातीर उणो काळ मेळटलो. अशें जरी आसलें तरी हांव पणजे उदरगतीचीं कामां करीत रावतलों. महापालिका वेंचणूक काळांत लोकांक दिल्लीं आस्वासनां पुराय करपाचेर भर दितलों अशें रोहित मोन्सेरात हांणी सांगलें. शुक्रारा तांणी महापालिकेच्या महापौर पदा खातीर जाल्यार वसंत आगशीकार हांणी उपमहापौर पदासा खातीर आपले अर्ज सादर केले.
अर्ज दाखल केल्या उपरांत रोहित हांणी माध्यमां कडेन संवाद सादलो. तांणी म्हणलें, हांव विधानसभे खातीर यत्न जरी करतलों तरी लोकांक दिल्लीं आस्वासना पुराय करतलों. आमी ह्यान पयलींच लोकांचीं कामां चालू केल्यांत. महापौर म्हणून म्हाका स आठ म्हयन्यांचो काळ मेळटलो. हातूंत चडांत चड कामां पुराय करपाचो यत्न करतलों. लोकशायेंत कोणूय कोणाकूय मत दिवपाक शकता. एखाद्या प्रभागांत आमचो उमेदवार निवडून जरी येवंक ना तरी आमी सगल्यांचीं कामां करतले.
स्मार्ट सिटी खाला उरिल्ल्या कामांचो आमी आढावो घेतले. पणजी ई बस रायबंदर मेरेन व्हरपाचो आमचो विचार आसा. पणजेचे येरादारी कोयंडी विशीं आमी पुलीस खात्यांत चर्चा केल्या. रस्त्यार पडिल्लीं भंगार वाहनां काडटले. हांवें कॅसिनो विशींचें म्हजें पयलींच स्पश्ट केलां. मात पर्यायी रोजगार संदी हाडले बगर हे विशीं चड उलोवपाक मेळचें ना. शारांतल्या समस्या विशीं फुडले तीन म्हयन्यांनी एक उपाय येवजण तयार करून ते विशीं लोकांचीं मतां विचारांत घेतले, अशें रोहति हांणी म्हणलें.
तो निर्णय पक्ष घेतलें
मंत्री बाबूश मोन्सेरात हांणी ह्यान पयलींच हांव विधानसभा वेंचणूक लढटलों अशें सांगलां. मात कोणाक मतदारसंघांतल्यान लढयतले हाचो निर्णय पक्ष घेतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
