भांगरभूंय | प्रतिनिधी
एडीआरः गोंयच्या सगळ्या लोकसभा उमेदवारांचो डेटा जाहीर करून मांडलें मत
भांगरभूंय । प्रतिनिधी
पणजीः लोकां खातीर झगडीं वा गोंया खातीर एफआयआर हो एफआयआरूच आसता. जाचे कडेन पयशे आसात आनी गुन्यांवकारी फाटभूंय आसा, ताचे कडेन वेंचून येवपाची तांक चड दिसून येता. ते खातीर उण्यांत उणी गुन्यांवकारी फाटबूंय आशिल्ल्या उमेदवाराक मत दियात, असो उलो असोसिएशन ऑफ डॅमोक्रॉटीक डिफोर्म्साचे (आडीआर) गोंय संयोजक भास्कर आसोल्डेंकार हांणी मारला.
लोकसभा वेंचणुकेचे फाटभुंयेर एडीआरान गोंयच्या सगळ्या लोकसभा उमेदवारांचो डेटा जाहीर करून आपलें मत मांडलें. हे खेपे सात पांवड्यांनी देशांत वेंचणूक जाता. कांय मतदारसंघ रॅड अलर्ट म्हूण घोशीत केल्यात. त्या मतदारसंघांनी उबे राविल्ल्या उमेदवारांचेर गंभीर गुन्यांव आसात. ताका लागून ह्या मतदारसंघांनी विशेश लक्ष दिवन थंय सुरक्षा वाडोवची पडटा. ते खातीर हे मतदारसंघ रॅड अलर्ट म्हूण घोशीत करून तांची एक वळेरी तयार केले उपरांत एका पांवड्यार वेंचणूक घेतात, अशें आसोल्डेंकार हांणी सांगलें.
गोंयांत उबे राविल्ल्या 16 उमेदवारांतल्या 4 उमेदवारांचेर गुन्यांव नोंद आसात. जाल्यार त्या चारांतल्या एका उमेदवाराचेर गंभीर गुन्यांव नोंद आसा. वट्ट 25 टक्के सादे गुन्यांव जाल्यार 6 टक्के गंभीर गुन्यांव आशिल्ल्या उमेदवारांचो आस्पाव हे खेपे आसा.
गुन्यांवकारी फाटभूंय आशिल्ल्या उमेदवारांनी वेंचणुकेंत उबे रावचे न्हय, ह्या मताचे आमी आसात. गुन्यांवकारी फाटभूंय आशिल्ल्यांक उमेदवारी दिवपाचे प्रक्रियेंत राजकी पक्षांनी दर खेपे सुदारणा घडोवन हाडपाक जाय. जेन्ना खंयचोय मतदार मत दिवपाक बुथार वता तेन्ना तांणी खूब उणी गुन्यांवकारी फाटभूंय आशिल्ल्या उमेदवाराक मत दिवचें, अशें आमकां दिसता. ही प्रक्रिया समज तीन- चार वेंचणुकांनी सेगीत जाली जाल्यार आमकां नितळ उमेदवार मेळपाची शक्यताय आसा, अशें मत आसोल्डेंकार हांणी उक्तायलें.
कांय जाणांचेर गुन्यांव नोंद जाल्यात, पूण तांकां अजून दोशी थारावंक नात. हे जावपा खातीर न्याय प्रक्रियेक गती दिवपाची गरज आसा. जर हे खटले 15 वर्सां परस अदीक काळ चलतात जाल्यार आमी कितें करपाक शकतात, असो हुस्को आलोल्डेंकार हांणी उक्तायलो. कायद्या प्रमाण एकलो 2 वर्सां परस अदीक काळ बंदखणींत रावता जाल्यार ताका वेंचणुकेक उबो रावपाक मेळना. नवो उमेदवार आसूं वा अणभवी, हो कायदो सगळ्यांक लागू जाता. जांच्या कडेन पयश्यां सयत मसल पावर आसता तांकां जिखपाची संद चड आसता. गोंयांत पयशेंकार मनशांची गुन्यांवकारी फाटभूंय आसा तो वेंचून येवपाची चिन्नां दिसतात. फाटले लोकसभा वेंचणुकेंत 40 उमेदवारांतले 9 उमेदवार जांची गुन्यांवकारी फाटभूंय आशिल्ली आनी खूब पयशेय आशिल्ले, ते वेंचून आयले, अशें आसोल्डेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
