भांगरभूंय | प्रतिनिधी
पणजी ः दाबोळी विमानतळार शेनवारा, 8 जूनाक सुरक्षा उल्लंघनाचो गंभीर प्रकार घडलो. सुरताक वचपी इंडिगो एअरलायन्स विमानाचे आपत्कालीन दार विमानांत बसतना एका प्रवाशान उगडिल्ल्यान बोवाळ जालो. हाका लागून तंत्रीक अडचणी निर्माण जाल्यो आनी प्रवाशांची सुरक्षीततोक धोको निर्माण जालो.
नेमकें कितें जालें?
बोर्डिंग वेळार ही घडणूक घडली. सुरत वचपी विमानांत बसतना सिद्धपारा दिव्येश (34, गुजरात) ह्या प्रवाशान स्पश्ट सुचोवण्यो आसून लेगीत आपत्कालीन दाराचो फ्लॅप उगडलो. विमानांतल्या सुरक्षा वेवस्थेक लागून हो प्रकार रोखडोच लक्षांत आयलो. इंडिगो एअरलायन्साची सुरक्षा वेवस्थापक प्राजक्ता गांवस हांणी हे संबंदी दाबोळी विमानतळ पुलीस स्टेशनाचेर कागाळ दाखल केल्या.
प्रवाशाच्या हे वागणुकेक लागून विमानांत तंत्रीक त्रुटी निर्माण जाली. हाका लागून कांय वेळा खातीर विमान थांबवचें पडलें. सुदैवान हे घडणुकेंत कोणाकूच दुखापत जावंक ना. पूण हो एक सामको गंभीर सुरक्षा उल्लंघनाचो प्रकार मानतात आनी ताका लागून हेर प्रवाशांचो जीव धोक्यांत पडूं येतालो.
ह्या प्रकरणांत दाबोळी पुलिसांनी गुन्यांव नोंद केला. ह्या प्रकरणाचो फुडलो तपास पुलीस उपनिरिक्षक आकांक्षा देसाय करतात.
मजगतीं, विमान प्रवासांत सुरक्षेचे खर नेम लागू जातात. विमानाच्या खंयच्याय उपकरणांक हात लावप वा हेर नेमाचें उल्लंघन केल्यार गंभीर कायदेशीर परिणाम जावंक शकतात अशी शिटकावणी विमानतळ प्रशासनान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
