भांगरभूंय | प्रतिनिधी
अधिकार्यांचे जापेचेर भोमा ग्रामस्थ असमाधानीच!
पणजी : ग्रामस्थांचे हजेरेंत आनी पुलीस संरक्षणांत महामार्गाचे अभियंते आनी अधिकार्यांनी भोमा फ्लायओव्हराचे शिमेची मेजणी (आरेखन) केली. त्या वेळार भोमा तणावाचें वातावरण आशिल्लें. अधिकार्यांचे जापे उपरांतूय भोमाच्या लोकांचें समाधान जावंक नां. लोकांक बायपास रस्तोच जाय आशिल्ल्यान ही नड कायम आसा. हाका लागून ग्रामस्थ परत मुख्यमंत्री डॉ. प्रमोद सावंत हांची भेट घेतले.
सोमारा मंत्रालयांत महामार्गाच्या विस्तारीकरणा विशीं भोमाच्या ग्रामस्थां मुखार सादरीकरण जालें. उपरांत आयज मंगळारा अभियंते आनी अधिकार्यांनी ग्रामस्थांचे हाजेरींत शिमो आरेखन केल्यो. रस्त्याच्या कुशीक ३० ते ४५ मिटर मेरेन जमिनीचें संपादन केलां. ते प्रमाण आरेखन केलें. बाणस्तारी पूल ते कुंडय मेरेन २५ मिटराचें रूंदीकरण आसतलें, अशें अधिकार्यांनी सांगलें. आरेखन ४५ मिटरां मेरेन कित्याक करता, असो प्रस्न केलो. हाका लागून ताण निर्माण जालो. जें आरेखन केलां, ते प्रमाण सांतेरी देवळाचो दीपस्तंभ आनी तुळस वतली हें स्पश्ट जाता. आराखड्या प्रमाण आरेखन केल्ल्यान चड घरां वचपाचो हुस्को संजय नायक हांणी उक्तायलो. तांच्या फुडारपणा खाला भोमा ग्रामस्थ महामार्गा खाला जावपी फ्लायओव्हराक विरोध करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
