उटंगाराच्या पावसांत स्मार्ट सिटीं परत बुडली

भांगरभूंय | प्रतिनिधी

पावसान दाखोवन दिल्यो चुको, आमी त्यो सुदारतलेः बाबूश

पणजी, प्रतिनिधीः दोन दीस सेगीत पडपी उटंगाराच्या पावसांक लागून पणजी स्मार्ट सिटीचें घाळपण उक्ताडार आयलें. पणजे शारांतले चडशे वाठार उदका पोंदा गेले. मिरामार कांपाल हुंवारा सारकी परिस्थिती निर्माण जाल्ली. हे विशीं थळावे आमदार बाबूश मोन्सेरांत हांकां विचारल्यार तांणी सांगलें, कामांत चुको खंय जाल्यात त्यो पावसान आमका दाखोवन दिल्यात. फुडारांक आमी त्यो चुको सुदारतले.
वर्स पद्दती प्रमाण 18 जून रस्तो उदका पोंदा गेलो. काल रातीं सावन पावस पडून 18 जून वाठार ल्हव ल्हव बुडपाक लागलो आनी सकाळ मेरेन पुराय रस्ते उदका पोंदा गेले. पुराय रस्त्यार उदक भरिल्लें आनी उदकांतल्यान वाट काडपी गाडयांक लागून हें उदक दुकानांनी वचपाक लागलें. एक म्हयन्या पयलीं ह्या वाठारांतली गटारां उस्पिल्लीं तरी लेगीत उटंगाराच्या पावसांत गटारां तुंडूंब भरून 18 जून तशेंच त्या रस्त्यांक जोडपी हेर रस्त्याचेर उदक तुंबिल्लें.
पणजे पाट्यांर हीच परिस्थिती पळोवपांक मेळ्ळी. कला आनी संस्कृती भवन, धेंपो टॉवर, सेसा घर ह्या वाठारांतले रस्ते पुराय उदका पोंदा गेल्ले. कला आनी संस्कृती भवना कडेन धोंपरभर उदक भरिल्लें. ह्या रस्त्या वयल्यान स्कुटरी चलयतना लोकांक सर्कसी करच्यो पडटाल्यो. ते भायर सिवेजीच्या चेंबरांतल्यान म्हेळे उदक ओव्हरफ्लोव जावन पावसाच्या उदकांत मेळ्ळें. देखून लोकांक घाणी सोंसच्यो पडल्यो तशेंच ह्या घाणयाऱ्या उदकांतल्यान वाट काडची पडली.
मिरामार आनी कांपाल पयलेच खेपे हुंवार आयलो. सांतीनेज खारजाची उदकाची पातळी वाडिल्ल्यान उदक कुशीच्या वाठारांनी सरलें देखून कांपाल लेकव्हीव कॉलनी तशेच मिरामारच्या ला- कांपाला कॉलनीत बुडटी आयली. लोकांक घरांतल्यान भायर पडप कुस्तार जाले. स्मार्ट सिटीच्या कामाचो साईडइफेक्ट पयलेच खेपे कांपाल आनी मिरामारच्या थळाव्यांक पळोवपाक मेळ्ळो.
जाल्यार कामारभाट पणजे सांतइनेज पोंयेचे उदक रस्त्यावेल्यान व्हांवपाक लागले आनी हे उदक कुशींकच्या वाठारांनी घुसलें. पोंय आनी तांका जोडपी गटारां उस्पूंक नाशिल्ल्यान हें उदक आडावन उरलें आनी सेगीत पडपी पावसांक लागून ओव्हरफ्लोव जावन पुराय रस्त्याचेर पातळ्ळें. रस्तो तशेंच सांकव उदका पोंदां गेलो. ह्या वाठारांक ते तेंकून कांय खोपीं आनी गाडे आसात. हे उदक तांतूत लेगीत घुसलें.
हे विशीं थळावे आमदार बाबूश मोन्सेरांत हांकां विचारल्यार तांणी सांगलें, हो वेळ आमची परिक्षा घेता. स्मार्ट सिटीच्या संबंदीत कितें चुको घडल्यात तें आमकां कळटलें आनी ते सुदारपाक आमी बांदील आसतले.
सध्या पावसांक दोश दिवचे सोडून आमी कांय करपाक शकनात. उलोवचे परस जी परिस्थिती निर्माण जाला तिचें मुल्यांकन आमी करतात, अशें बाबूश हांणी सांगलें.
कंत्राटदारांक दिल्ले टेंडरांत कामाचो दर्जो कसो आसपाक जाय हे स्पश्ट सांगलां. एकदां कामाचे मुल्यांकन जावनी जे काम कंत्राटदारान केलां तें पळोवन आमी तांकां जापसालदार धरतले तशेंच सल्लागारांकय आमी सोडचे नात, अशी शिटकावणी बाबूश हांणी दिली.

पावसाक लागून आयज गोंयच्या साबार वाठारांनी घडिल्ल्यो घडणुको

आयज पुराय दीस गोंयांत पावसाक लागून लोकजीण विस्कळ्ळी. तशेंच साबार सुवातांचेर विवीध घडणुको घडल्यो. कांय कडेन झाडां कोसळ्ळीं जाल्यार कांय कडेन पालसणां. राज्यांत आयज पावसाक लागून खंय कितें घडलें हें थोडक्यांत जाणून घेवया:

हवामान खात्यान आयज दिल्लो ऑरेंज अलर्ट रद्द करून परतून पावसाचो रेड अलर्ट दिला. आयज सकाळ्यान पावस झडटा. तशेंच पावसांत आनीकूय वाड जावपाची शक्यताय हवामान खात्यान उक्तायल्या. तशेंच फाल्यां ऑरेंज अलर्ट आनी १० ते १२ जुलय मेरेन येलो अलर्ट जारी केला.

शेनवारा सावन सुरू जाल्ल्या उटंगाराचो पावस आनी काल पुराय दीस झडिल्ल्या पावसाक लागून दिवचल शारांतल्या दुकानांनी उदक घुशिल्लें. आयज सकाळीं मेरेन उदक उणें जाल्ल्यान परिस्थिती नियंत्रणांत आयल्या.तशेंच करंझाळे दर्यावेळेर जाळी दुरुस्त करपा खातीर एक शेड उबारिल्ली. ती आयज पावसाक लागून कोसळ्ळी. ही शेड कोसळिल्ल्यान तातूंत आशिल्ल्या कामगारां मदले दोग कामगार जखमी जाले.

गिरी आयज पावसाच्या उदकाक लागून अपघात घडलो. पावसाचें उदक रस्त्याचे सांठून उरिल्ल्यान त्या उदकाचो अदमास चालकाक येवंक नाशिल्ल्यान गाडी व्हांवून झाडाक आडकली. ह्या अपघातांत कोणाक काय जावंक ना. मात गाडयेचें लुकसाण जालें.

पावसाक लागून ‘ला कांपाल कॉलोनी’च्या रस्त्यार व्हांवून आयली घाण. ताका लागून हे घाणिंतल्यान रस्तो काडटना येरादारींक आडखळ निर्माण जाली. तशेंच आल्तिनचे भितरले रस्ते उदका पोंदाक गेले. उदकांतल्यान वाट काडटना लोकांक बरेच त्रास सोसचें पडटात.

पणजी नगरपालिका आनी उजो पालोवपी दळान सुरक्षात्मक उपाय येवजण आयज चालीक लायली. हे येवजणे खाला दळान सुशीला इमारत आनी १८ जून रस्त्या लागसाराच्या धोक्याच्या झाडांचे फांटे कापले.

मदलो माज – मांद्र्यां कृष्णा कलशांवकार हांच्या घराचेर आयज पणसाचें झाड पडलें. उजो पालोवपी जवानांनी हे विशीं म्हायती मेळटांच तें घरा वयल्यान कुशीक केलें. हे घडणुकेंत घर धनयाचें सुमार २५ हजार रुपयांचें लुकसाण जालां.

उटांगाराच्या पावसांक लागून हायवे कडल्यान मेरशे वचपी रस्तो उदका पोंदा आयला. लोकांक जीव मुठीत घेवन गाडयेंतल्यान वाट काडची पडटा. हायवे बांदकामचें नियोजन सारकें नाशिल्ल्यान तशेंच पंचायतीन गटारां उसपूंक नाशिल्ल्यान हुंवाराची परिस्थिती निर्माण जाल्ल्याचो आरोप थळाव्यांनी केला.

शांतीनगर खोर्ले म्हापशेंच्या प्रभाग १५ त पालसण कोसळून मनोहर गडेकार हांच्या घरांक धोको निर्माण जाला.

धारगळे- महाखाजान गांवांत म्हामार्गा वयलीं पालसणां पंदरा दिसांनी परत दुसरे फावट कोसळिल्ल्यान कंत्राटदाराच्या कामाचो दर्जो कितलो उंचेलो तें दिसलें. हे घडणुकेंत कोणाक कांय जावंक ना. हांगा पालसणां कोसळिल्ल्यान आयज गोंय कॉंग्रेसीचे अध्यक्ष अमित पाटकार, विरोधी पक्ष फुडारी युरी आलेमांव, आमदार कार्लोस फेरेरा, आमदार एल्टन डिकोस्ता हांणी राष्ट्रीय महामार्ग वाठाराची पळोवणी केली.