भांगरभूंय | प्रतिनिधी
पावसान दाखोवन दिल्यो चुको, आमी त्यो सुदारतलेः बाबूश
भांगरभूंय । प्रतिनिधी
पणजीः दोन दीस सेगीत पडपी उटंगाराच्या पावसाक लागून पणजी स्मार्ट सिटीचें घाळपण उक्ताडार आयलें. पणजे शारांतले चडशे वाठार उदका पोंदा गेले. मिरामार, कांपालार हुंवारा सारकी परिस्थिती निर्माण जाल्ली. हे विशीं थळावे आमदार बाबूश मोन्सेरात हांकां विचारल्यार तांणी सांगलें, कामांत चुको खंय जाल्यात त्यो पावसान आमकां दाखोवन दिल्यात. फुडारांक आमी त्यो चुको सुदारतले.
वर्स पद्दती प्रमाण 18 जून रस्तो उदका पोंदा गेलो. आयतारा रातीं सावन पावस पडून 18 जून वाठार ल्हवू ल्हवू बुडपाक लागलो आनी सकाळ मेरेन पुराय रस्ते उदका पोंदा गेले. पुराय रस्त्यार उदक भरिल्लें आनी उदकांतल्यान वाट काडपी गाडयांक लागून हें उदक दुकानांनी वचपाक लागलें. एक म्हयन्या पयलीं ह्या वाठारांतलीं गटारां उस्पिल्लीं तरी लेगीत उटंगाराच्या पावसांत गटारां उपाट भरून 18 जून तशेंच त्या रस्त्यांक जोडपी हेर रस्त्याचेर उदक तुंबिल्लें.
पणजे पाट्यार हीच परिस्थिती पळोवपांक मेळ्ळी. कला आनी संस्कृती भवन, धेंपो टॉवर, सेसा घर ह्या वाठारांतले रस्ते पुराय उदका पोंदा गेल्ले. कला आनी संस्कृती भवना कडेन धोंपरभर उदक भरिल्लें. ह्या रस्त्या वयल्यान दुचाकी चलयतना लोकांक सर्कस करच्यो पडटाली. ते भायर सिवेजीच्या चेंबरांतल्यान म्हेळें उदक ओव्हरफ्लो जावन पावसाच्या उदकांत मेळ्ळें. देखून लोकांक घाणी सोंसच्यो पडल्यो तशेंच ह्या घाणयाऱ्या उदकांतल्यान वाट काडची पडली.
मिरामार आनी कांपालार पयलेच खेपे हुंवार आयलो. सांतिनेज खारजाची उदकाची पातळी वाडिल्ल्यान उदक कुशीच्या वाठारांनी सरलें देखून कांपाल लेकव्हीव कॉलनी तशेंच मिरामारच्या ला- कांपाला कॉलनींत बुडटी आयली. लोकांक घरांतल्यान भायर पडप कुस्तार जालें. स्मार्ट सिटीच्या कामाचो सायडइफेक्ट पयलेच खेपे कांपाल आनी मिरामारच्या थळाव्या लोकांक पळोवपाक मेळ्ळो.
जाल्यार कामारभाट पणजे सांतिनेज पोंयेंचें उदक रस्त्या वयल्यान व्हांवपाक लागलें आनी हें उदक कुशींच्या वाठारांनी घुसलें. पोंय आनी तांकां जोडपी गटारां उस्पूंक नाशिल्ल्यान हें उदक आडावन उरलें आनी सेगीत पडपी पावसाक लागून ओव्हरफ्लो जावन पुराय रस्त्याचेर पातळ्ळें. रस्तो तशेंच सांकव उदका पोंदां गेलो. ह्या वाठाराक तेंकून कांय खोपीं आनी गाडे आसात. हें उदक तातूंत लेगीत घुसलें.
सध्या पावसाक दोश दिवचे सोडून आमी कांयच करपाक शकनात. उलोवचे परस जी परिस्थिती निर्माण जाला तिचें मुल्यांकन आमी करतात, अशें बाबूश हांणी सांगलें. कंत्राटदारांक दिल्ल्या टेंडरांत कामाचो दर्जो कसो आसपाक जाय हें स्पश्ट सांगलां. एकदां कामाचें मुल्यांकन जावंदी, जें काम कंत्राटदारान केलां तें पळोवन आमी तांकां जापसालदार धरतले तशेंच सल्लागारांकय आमी सोडचे नात, अशी शिटकावणी बाबूश हांणी दिली.
हो वेळ आमची परिक्षा घेता. स्मार्ट सिटीच्या संबंदीत कितें चुको घडल्यात तें आमकां कळटलें आनी त्यो सुदारपाक आमी बांदील आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
