भांगरभूंय | प्रतिनिधी
उजो पालोवपाच्या धोक्याच्या वेवस्थापनांत उजो सुरक्षेचे नेम आनी कायदे हांचो म्हत्वाचो वांटो आसा. संवसारभर उजो हो विंगड विंगड उद्देगीक क्षेत्रांत म्हत्वाचो धोको म्हूण मान्यताय मेळ्ळ्या. खंयतरी उजो लागपाची घडणूक घडली म्हूण चड करून दर दिसा देशभरांतल्या प्रसार माध्यमांनी एक तरी खबर आयकूंक, पळोवंक मेळटाच. अशा उज्याक लागून जायत्या जाणांचो जीव वता, जायते जखमी जातात. इतलेंच न्हय तर मालमत्तेचें व्हडा प्रमाणांत लुकसाण जाता. अक्षरशा कोट्यांनी रुपयांचें.
फाटल्या दोन दशकांत भारतभर बांदकाम कार्यावळींत खास करून उंच इमारतीच्या मळार व्हड प्रमाणांत वाड जाल्या. ताच्या विशिश्ट स्वरुपाक लागून, निवासी इमारतींनी उजो, खास करून, उंच इमारतींतलो उजो हाताळप चड गुंतागुंतीचें आसता आनी ताका लागून लोकांक भायर काडप, मालमत्ता वाटोवप हाचेर परिणाम जाता. साल्व्हेज ऑपरेशनां चड कठीण जातात आनी केन्ना केन्नाय मरण आनी व्हड मालमत्तेचें लुकसाण लेगीत जाता. भारतीय उद्देगाचें नेटान आधुनिकीकरण जाल्ल्यानय परिस्थिती चड गुंतागुंतीची जाल्या. उजो पालोवपाचे सुरक्षे विशीं जागृताय पुरायपणान मुखार आयिल्ली ना. सुरक्षीत घर वा वाठार तयार करप ही उज्या पसून सुरक्षीत राष्ट्र तयार करपाची गुरुकिल्ली. म्हणटात तशें, चॅरिटी घरांतल्यान सुरू जाता, उजो पालोवपाची जागृताय लेगीत आमच्याच घरांतल्यान सुरू जाता.
निवासी धोके चड करून उज्याक लागून जातात. गॅस गळटी वा विद्युत ओव्हरलोड वा शॉर्ट सर्किट हाका लागून उजो लागपाचे अपघात, दुर्घटना जावंक शकतात. केन्ना- केन्नाय सदोश उपकरणांक लागून निर्माण जाल्ली उश्णताय उज्याचो स्रोत जावंक शकता. फर्निचर, पडदे, लांकडी दार आदी वेगवेगळ्यो घरगुती वस्तू दुर्घटनेंत इंधन म्हूण काम करतात आनी ताका लागून घरांतल्यान इमारतीच्या कांय भागांत उजो नेटान पातळटा. तोय मोट्या प्रमाणांत. जळपा सारके पदार्थ हाताळप आनी सांठोवप, तशेंच प्रज्वलन स्रोतांचो वापर वा गैरवापर हाका लागून निवासी वाठारांत धोक्याची परिस्थिती निर्माण जावंक शकता, जाका लागून मालमत्ता आनी मनशाचो जीव वचूंक शकता. तशेंच, उजो आयुश्यभरांतल्यो यादीं आनी वस्तूय ना करपाक शकता.
घर वा इमारत आस्थापनाची सुरक्षीतताय आनी राखण सुनिश्चीत करून लुकसाण जावचें न्हय हें आनी जीव वाटावप म्हत्वाचें आसलें तरी दागिने, मालमत्ता, आनी विमो कागदपत्रां, हेर म्हत्वाचीं कागदां, पासपोर्ट, प्रमाणपत्रां आदी मोलादीक वस्तू आनी वस्तूंची राखण करप लेगीत खूब म्हत्वाचें. कारण ह्या मालमत्तांचें लुकसाण लोकांक जायत्या वर्सां फाटीं व्हरूंक शकता. मनस्ताप दिवंक शकता. हालींच्या वर्सांनी फायर डिटेक्शन आनी सप्रेशन तंत्रगिन्यान चड प्रगत जालां. उजो सोदून काडपाची आनी तो पालोवपाची मुळावी गजाल चड करून सारकीच उरल्या, पूण नव्या उत्पादनांक लागून चड कार्यक्षम आनी टिकावू उपाय मेळटात, तशेंच ते सुरक्षीत अशेय आसतात.
आमी हालींच ‘स्मार्ट इमारती’ च्या संख्येंत वाड पळयल्या. 2016 वर्सा स्मार्ट इमारतींनी पांच लाख जोडणी आशिल्ल्याचो अदमास आशिल्लो. 2025 मेरेन हें वाडून 15 कोटी वयर जोडणी जातल्यो, असो अदमास आसा. ह्या स्मार्ट इमारतींतल्या जायत्या इमारतींनी फुडाराक उजो सोदून काडपाक अत्याधुनीक तंत्रज्ञान आसतले. हे यंत्रणेंत तापमानाचें निरिक्षण करपा खातीर संवेदकांचो उपेग करतात.
निवासी जाग्यार हाजीर आशिल्ल्या आयओटी उपकरणांनी फुडाराच्या उदयाक येवपी तंत्रगिन्यानाक आनी संवेदक तांक, तशेंच उच्च तंत्रज्ञान संचारण प्रणालींतल्या सुदारणांक लागून नव्या तंत्रज्ञानाच्या उजो पालोवपाच्या सुरक्षेच्या उपायांची अंमलबजावणी वेगान केल्या.
भारतांत उजो पालोवपी दळाचीं मानकां खूब बरीं आसात, आनी वेवसायीक तशेंच निवासी आस्थापनां खातीर इमारतीचे कोड खूब व्यापक आसात. पूण सादारणपणान उपयोजनाचे नदरेन आमकां अंतर दिसता. थंयच नियंत्रकांक खर ऑडिट वा उजो पालोवपी सुरक्षेच्या मानकांची अंमलबजावणी चालीक लावपा खातीर यंत्रणा सोदून काडची पडटली. हाका लागून रहिवाशांची सुरक्षीतताय जातली.
आमच्या मोलादीक वस्तूंक, आमच्या स्वताच्या फुडारा खातीरय आकस्मीक येवजण जाय पडटा आनी देखून उजो पालोवपाच्या योग्य उपायांत गुंतवणूक करप गरजेचें जाता. उजो पालोवपी आणीबाणीच्या वेळार दरेक मिनिट मेजता आनी सादारणपणान उजो पालोवपी उपकरणांक जाय अशें दिसता.
अपघाताच्या सुवातेर पावपाक येरादारीक लागून वेळ लागता. हाचेरुय उपाय जाय. उसरां पाविल्ल्यान उजो पालोवपाक वेळ लागूं येता.
मोलादीक वस्तूंची राखण करपाक मदत जातली अशा तंत्रगिन्यानांत गुंतवणूक केल्यार व्हडलो फरक पडूं येता. उजो प्रतिरोधक संरक्षण उपकरणांत मोलादीक वस्तू आनी म्हत्वाचे दस्तावेज सांठोवन दवरल्यार ते सुरक्षीत उरूं येतात आनी हाका लागून खूबशी निराशा टाळूं येता. उज्याच्या प्रकोपा पसून मोलादीक वस्तूंची राखण करपा खातीर घरमालक उच्च दर्जाचीं तिजोरी आपणावंक शकतात, जी तांच्या वैयक्तीक वस्तूंची राखण करता. संकश्टाच्या वेळार कुटुंबांच्या मोलादीक वस्तूंची आनी वस्तूंची राखण करपा खातीर उजो प्रतिरोधक तिजोरी आसात. ह्या तिजोऱ्यांनी गरम वायू, धुंवर आनी भितरली उश्णताय बादक थारची न्हय, म्हूण खाशेलपणां आसतात. पूण ह्या घरगुती तिजोऱ्यां कडेन रेटिंग आनी प्रमाणीकरण लेबल आसा हाची खात्री करची पडटली, जी खर चांचणेचो परिणाम आसा हाची खात्री करपा खातीर उच्च दर्ज्याची उजो पालोवपाची सुरक्षीतताय आनी सुरक्षा सतत उदरगती वांगडाच वाडत आसा, खास करून आधुनीक निवासी सुवातींनी. आधुनीक निवासी सुवातींच्या सतत विकासा वांगडा उजो पालोवपाची सुरक्षीतताय आनी सुरक्षा सतत विकसीत जायत आसा. रियल इस्टेट क्षेत्र सदांच नवीनतम तंत्रगिन्यानाच्या आदारान संशोधन आनी नवनिर्माण करून जमनीचो बरो वापर करपाक लागला. रियल इस्टेटांतल्या ह्या बदलांक पळयल्यार, फाटल्या दशकांत उजो पालोवपी सुरक्षीतताय आनी सुरक्षा उद्देगांत अपघाता उपरांतचो धोको कमी करपा सावन अपघात आडावप आनी संभाव्य दुर्घटनांचीं कारणां सोदून काडपा मेरेन म्हत्वाची उदरगत जाल्या.
त्याच वेळार ह्या सुवातींनी रावपी लोकांनी फावो ते उजो सुरक्षीतताय आनी सुरक्षा उपाय, मानकां प्रमाण उपकरणां जाग्यार घालपाचें म्हत्व जाणून घेवंक जाय. त्याच बराबर, ह्या उपकरणांची योग्य देखरेख सुनिश्चीत करप लेगीत म्हत्वाचें, जाका लागून हीं गरज पडटा ते प्रमाण आनी तेन्ना कार्यक्षम आसतलीं. वास्तुशिल्पी, विकसक आनी बिल्डरांनी आधुनीक, अत्याधुनीक उपाय आनी प्रतिबंधाचेर आदारीत रणनिती निवडपाक जाय, जी व्हड धोको उणो करपाक मदत करतली. अशे उपाय आनी उपकरणां खर्च म्हणून न्हय तर गुंतवणूक म्हणून पळोवचीं.
आधुनीक उजो पालोवपी सुरक्षेच्या उपकरणांची जागृताय सद्या सामकी उणी आसा. पूण, अशा सुरक्षेच्या उपकरणां आनी उपायां खातीर एकंदर मागणी वाडोवपाक मदत करतली. ही वाड चड कंपनींक मुखार हाडून नव्या तंत्रज्ञान आनी प्रणालींच्या संशोधन आनी विकासांत गुंतवणूक करपाक प्रोत्साहन दितली, जी परतून ‘उजो सुरक्षीत राष्ट्र’ उबारपाचे दिकेन चळवळ सुरू करतली.
नितीन व्ही. रायकार
संचालक
अग्नी शमन आनी आपत्कालीन सेवा संचालनालय
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
