भांगरभूंय | प्रतिनिधी
उपजिल्होधिकारी निलेश धायगोडकारः सगळ्या खात्यांच्या अधिकाऱ्यांक आदेश
भांगरभूंय । प्रतिनिधी
फोंडें: धारबांदोडें म्हालाचे उपजिल्होधिकारी निलेश धायगोडकार हांणी म्हालांत उज्याच्यो घडणुको वाडिल्ल्यान आपत्ती वेवस्थापना संबंदांत चर्चा करचे खातीर खाशेली बसका घेतली. तातूंत मामलेदार लक्ष्मीकांत कुट्टीकार, भलायकी अधिकारी डॉ. संदेश मडकयकार आनी विवीध खात्याचे अधिकारी वांटेकार जाल्ले. उज्याच्यो दुर्घटणा आडावपा खातीर सगळ्या खात्याच्या अधिकाऱ्यांनी सतर्क रावचे, असो आदेश उपजिल्होधिकारी धागदोडकार हांणी दिलो. तशेंच थळाव्या लोकांनी लेगीत रान खात्याक आदार करचो, असो उलो मारलो.
धारबांदोडें म्हालांत फाटल्या कांय दिसां सावन उजो लागपाच्यो घडणुको वाडल्यात. उजो पालोवपा खातीर उजो पालोवपी दळाचे आनी रान खात्याचे कर्मचारी यत्न करतात. तांकां गरजेच्या वेळार मजत करचे खातीर विवीध पंचायत मंडळांनी मनरेगच्या कामगारांची वेवस्था करून दिवपाची गरज आसा. तशेंच लोकां मदीं उजो पालोवपा संबंदांत जागृताय करपाची गरज आसा. कृशी खात्याच्या अधिकाऱ्यांनी तशेंच पंचायत मंडळांनी गांवांत वचून जागृताय करचे, असो आदेश उपजिल्होधिकारी धायगोडकार हांणी दिलो.
उजो लागपाचें कारण स्पश्ट अजून स्पश्ट जावंक नासलें तरीय उज्यांत व्हड प्रमाणांत काजीं लासल्यात. कृशी खात्या वतीन लासिल्ल्या काजू बागायतींचो पंचनामो करून शेतकारांक भरपाय दिवची. तशेंच पुलिसांनी म्हालांतल्या विवीध वाठारांनी गस्त घालून उज्याच्यो घडणुको आडावपा खातीर यत्न करचे. उजो लायिल्ल्या संबंदांत एकादो दुबावीत सांपडलो जाल्यार पुलिसांनी ताचेर खर कारवाय करची असो लेगीत आदेश उपजिल्होधिकारी धायगोडकार हांणी दिला. राष्ट्रीय म्हामार्गाचेर धोकादायक स्थितींत आशिल्लीं खूबशीं झाडां मारचे खातीर बांदकाम खात्याच्या अभियंत्यांनी रान आनी उजो पालोवपी दळाच्या अधिकाऱ्यांची मजत घेवची. सांग्यार झाड पडून दुर्घटणा घडिल्ली, ताची दखल घेवन अशे प्रकार परतून जावचे न्हय हे खातीर सतर्क रावपाची गरज आसा. पावसाळ्या आदीं धोकादायक स्थितींतलीं झाडां मारपाचो आदेश उपजिल्होधिकारी धायगोडकार हांणी बांदकाम खात्याच्या अभियंत्यांक दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
