भांगरभूंय | प्रतिनिधी
पेखत आयिल्लो घांवो खरपुपाची संवय जायत्या जाणांक आसता. अमेरिका तातूंतली एक. काल इराण- इझ्रायला मदीं चलिल्ल्या झुजांत तांणी पांय घालो आनी इराणाचीं तीन अणु संशोधन केंद्रां बाॅम्ब घालून नश्ट केलीं. हातूंत शास्त्रज्ञ, अधिकाऱ्यांक मरणूय आयलें. उज्यांत पॅत्राॅल ओतपाचो हो प्रकार. ‘बेगानी शादी में अब्दुला दिवाना’ अशें म्हणटात. संबंद नाशिल्ल्या कामांत तो लक्ष घालतालो, पूण, ह्या अमेरिकन अब्दुलाचो भितरल्यान सगले कडेन संबंद! डोनाल्ड ट्रम्प हांणी इराणाक शिटकावणी दिल्या, झूज बंद करून शांतीकाय पातळावची. नाजाल्यार फुडाराक हाचे परस व्हडलो हल्लो करतले. दुसरे वटेन इराण म्हणटा, ‘मि. ट्रम्प, तुमी हें सुरू केलां. पूण हाचो शेवट आमी करतले.’ इराणान अणुबाॅम्ब तयार केल्यार तो आमकां त्रासांत घालतलो, अशें म्हणीत इस्रायलान दुस्मान इराणाचेर पयलीं हल्लो केलो आनी अमेरिकेचे कालचे भुमिकेन हें सगलें तिसऱ्या म्हाझुजाचेर पडटा काय कितें, अशी भिरांत पुराय संवसाराक दिसपाक लागल्या. आमच्या देशा सयत सगल्या देशांनी हें झूज थांबोवपाची विनवणी केल्या.
इझ्रायल देश स्थापन जायत सावन हो तणाव आखाती देशांनी आसा. सुरवेक शेजराच्या अरब देशांनी ताचेर घुरी घाली. इझ्रायलान अमेरिकेचे मजतीन यशस्वी लढो दिलो. उपरांत दुबळ्या पॅलेस्टायनाची जमीन तो ताब्यांत घेत रावलो. साहजिकूच दोनूय देशां मदलो संघर्श कायम धगधगत आसा. हमासान कांय म्हयन्यां पयलीं इझ्रायलाची कळ काडली आनी ताचे भोग लाखांनी पॅलेस्टिनींक आयज पसून भोगचे पडटात. ह्या लढ्यांत इराण आनी कांय मुस्लीम देशांच्या बंडखोर संघटनांनी हमासाक साथ दिली. इराण- इझ्रायलांत आयज जें कितें सुरू आसा, हो ताचोच परिणाम. फुडाराक आखाती देशांतले बंडखोर पश्चिमी राष्ट्रांचेर उक्तेपणी वा गुपीत हल्ले करपाची भिरांत आसा. शह- काटशहाच्या ह्या खेळांत कितल्या लोकांक मरण आयलां, ताचो खरो आंकडो मेळना. मेळचोय ना.
सगल्या संवसाराचेर म्हासत्ता अमेरिका शेक दवरपाक सोदता. रासायनीक बाॅम्बाच्या नांवा खाला तिणें गरज नासतना इराक सोंपयलें. अफगाणिस्तानाक बुद्द शिकयतना तांकांच फाटीं सरचें पडलें. आतां इराणाचो ते कान धरपाक सोदतात. हांगाच्या साधनसंपत्तीचेर तांचो दोळो आसतलो. ताकाच लागून तांणी इझ्रायलाक सांगून हो हल्लो करपाक सांगला, अशें जाणकाराचें मत. पूण, इराण म्हणजे इराक न्हय हाचो अमेरिकेक विसर पडला. इराणाक रशिया, चीनाचें भितरल्यान साह्य आसा. पाकिस्तानाक तुर्कियेचें आशिल्लें तशें. ह्या झुजाच्यो खबरो येतात, त्योय इझ्रायलाचे वटेन. आतां अमेरिकेक लागून तांचीं वा तांच्या इश्ट देशांचीं प्रसारमाध्यमांक सत्य खबरो दितलींच हाची खात्री ना. प्रत्यक्षांत घडटा एक पूण लोकांक कळटा भलतेंच, अशेंय जावंक शकता.
इराण अणुबाॅम्ब तयार करता ही गजाल खरी. खुद्द तांणीच तें सांगलां. उर्जे खातीर आमी तो करता, असो तांचो दावो. तशे आयज भोवतेक देशां कडेन अणुबाॅम्ब आसात. कांय जाणांनी तें जाहीर करूंक ना. इराण हो भारताचो इश्ट. सगल्या देशांचे विद्यार्थी थंय शिकतात. आमी आमच्या विद्यार्थ्यांक परत हाडल्यात. ब्रिटन, आॅस्ट्रेलियानूय तशे यत्न सुरू केल्यात. झुजाचो कोणाक फायदो जायना. संयुक्त राष्ट्रांनी शांतीकायेचो उलो मारला. फ्रान्स, इटली, जर्मनी सारक्या देशांनी इराणांतल्या अणु केंद्राचेर हल्लो करप धोक्याचें अशें सांगलां. रशियेन उक्तेपणी इराणा वयल्या हल्ल्याचो निशेध केला. इराणान समजीकायेन घेवचें, अशेंय तांचें म्हणणे. इराणा सयत भोवतेक सगल्याच देशांक हें झूज नाका, अमेरिका आनी इझ्रायल सोडून. इराणा वटेन उबीं आशिल्लीं सावदी, कटार, युएई सारकीं इस्लामी राष्ट्रां म्हणटात, आखाती देशांक हें झूज त्रासांत घालतलें. फट न्हय तें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
