उज्जैनच्या महाकालेश्वर देवळाचे गर्भकुडीक लागलो उजो: भटजी सयत १३ जाण हुलपले

भांगरभूंय | प्रतिनिधी

भोपाळ, खबरां संस्था: उज्जैनांतल्या महाकालेश्वर मंदिरांत सोमारा सकाळीं भस्म आरती सुरू आसतना गर्भकुडींत उजो लागलो. हातूंत भटजी सयत १३ जाण हुलपले. आरती मजगतीं गुलाल मारिल्ल्यान उजो लागिल्ल्याचें सांगतात. अपघात जालो तेन्ना देवळांत हजारांनी भावीक महाकाला वांगडा होळी मनयताले.

फाटल्यान आरती करपी पुजारी संजीव हांचेर कोणेंतरी गुलाल ओतिल्ल्याचें जखमी सेवकान सांगलें. गुलाल दिव्याचेर पडलो. गुलालांत कांय रसायनां आशिल्ल्यान उजो लागिल्ल्याचो अदमास उक्तायला.

गर्भकुडींत चांदीच्या आवरणाक रंगा पसून वाटावपा खातीर आंबाडी लायतात. हाका लागूनय उजो लागलो. कांय लोकांनी उजो पालोवपी यंत्रांचे मजतीन उजो नियंत्रणांत हाडलो. मात, तो मेरेन गर्भकुडींत आरती करपी संजीव पुजारी, विकास, मनोज, सेवक आनंद, कमल जोशी हांचे सयत १३ जाण हुलपले.

उज्जैनाचे जिल्होधिकारी नीरज सिंह हांणी, हे घडणुकेची चवकशी करपाचे आदेश दिले. हाचे खातीर समिती स्थापना केली. कांय जखमींक उज्जैन हांगच्या जिल्हो रुग्णालयांत दाखल केले. कांय जाणांक इंदूराक धाडले.

फाल्यांच्यान सदचे आरतीचो वेळ बदलतलो

आयज होळी मनतले. फांतोडेर ४ वरांचेर आरती वेळार भस्म आरतींत पयले महाकालाचेर रंग आनी गुलाल मारलो.
२६ मार्च पसून सदचे महाकाल आरतीच्या वेळेतूय बदल जातलो.