भांगरभूंय | प्रतिनिधी
सीआरझॅड कायद्याचें लेगीत केलां उल्लंघन
कारवाय करपाची खात्यांक शिफारस
प्रक्रिया करून एफआयआर दाखल करचो
भांगरभूंय । प्रतिनिधी
पणजी : हरमला शेनवारा फांतोडेर लागिल्लो उजो हो बर्च बाय रोमियो लेन क्लबाक लागिल्ल्या उज्या सारकोच प्रकार आशिल्ल्याची गजाल उपजिल्होधिकाऱ्याच्या अहवाला उपरांत स्पश्ट जाल्या. उजो शॉर्ट सर्किटाक लागून लागला आसलो तरी रेस्टॉरंण्ट धनयांचें घाळपण हें लेगीत कारण आसा, अशें अहवालांत म्हणलां. जिल्होधिकारी कार्यालयातल्या गोपां कडल्यान ही म्हायती मेळ्ळ्या. संबंदीत खात्यांनी योग्य ती तपासणी करून रेस्टॉरंण्टा आड एफआयआर दाखल करचो, अशें निर्देश खात्यांक दिल्यात.
ज्या रेस्टॉरंटाक उजो लागलो तांचे कडेन फायर एनओसी नाशिल्ली, उजो पालोपा खातीर फायर एक्स्टीग्युशर वा कसलीच तात्पुरती लेगीत वेवस्था नाशिल्ली. घरां फाटले वटेन वाडोवन रेस्टॉरंण्टां केल्यांत. दर्यादेगेचेर अतिक्रमण जावन सीआरझॅड कायद्याचें लेगीत उल्लंघन जालां. पंचायतीन पळोवणी करून अतिक्रमणा आड कायद्या प्रमाण कारवाय करची, अशी शिफारस आसा. रेस्टॉरंण्टाक तेंकून वीज सरयो आशिल्ल्यान वीज खात्यान गरजेचे ते सुरक्षेचे उपाय करचे. रेस्टॉरंण्टां कडेन एफडीएचे परवाने नात, तशेंच कसलेच तरेचें शुल्क भरिल्ल्याचीं कागदपत्रां धनयां कडेन नात. उपजिल्होधिकाऱ्यान चवकशी करपा सयत गरजेची ती कारवाय करपा विशींचीं पत्रां एफडीए तशेंच पर्यटन खात्याक बरयल्यांत.
रेस्टॉरंण्टांक लागिल्ल्या उज्याची चवकशी करून अहवाल सादर करपाचे आदेश उत्तर गोंय जिल्होधिकाऱ्यान पेडणें उपजिल्होधिकाऱ्याक दिल्लो. ते प्रमाण अहवाल सादर जाला.
हरमला शेनवारा फांतोडेर उजो लागून रेस्टॉरंण्टांचें लाखांनी रूपयांचें लुकसाण जालें. ही घडणूक धोकादायक आसा. अशा घडणुकांक लागून जिविताक लेगीत धोको निर्माण जावपाक शकता.
उजो लागिल्ल्या रेस्टॉरंण्टां कडेन आशिल्ले परवाने, प्रमाणपत्रां तशेंच एनओसीची तपासणी पेडणें उपजिल्होधिकाऱ्यान केली. शेनवारा फांतोडेर विजेच्या खांब्याचेर स्पार्क जावन खालचावाडा- हरमला उजो पेटलो. तातूंत 6 रेस्टॉरंण्टांचें व्हड लुकसाण जालें. थळाव्या लोकांनी उदक मारून उजो पालोपाक मजत केली. हो उजो शॉर्ट सर्किटाक लागून लागलो आसलो तरी रेस्टॉरंण्टां बेकायदेशीरपणान चलताली, हें स्पश्ट जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
