भांगरभूंय | प्रतिनिधी
4.94 कोटींची मालमत्ता वाटावपाक येस
उजो पालोवपी दळान ह्या वर्साच्या पयल्या 50 दिसांत जाल्ल्या आपत्कालीन घडणुकांनी 11 जाणांक जिवदान दिलें. ह्या वेळार दळाक 4.94 कोटी रुपयांची मालमत्ता वाटावपाक येस आयलें. तशेंच 94 जनावरांकूय वाटायलीं. जाल्यार 11 मनशांक आनी 4 जनावरांक मरण आयलें. जाल्यार उज्या सयत हेर आपत्कालीन घडणुकांनी 1.32 कोटी रुपयांचे मालमत्तेचें लुकसाण जालें.
मेळिल्ले म्हायती प्रमाण, मरण आयिल्ल्या 11 पैकी 9 जाणांक बुडून मरण आयिल्लें. वयल्या 50 दिसांत दळाक वट्ट 952 कॉल आयले. हातूंतले उज्या विशीं 680 जाल्यार हेर आपत्कालीन घडणुकां खातीर 272 कॉल आयिल्ले. सगल्यांत चड 117 कॉल दिवचल स्टेनार आयिल्ले. उपरांत मडगांव (105), म्हापशें (90), फोंडें (79), वेर्णें (61) जाल्यार कुडचडें स्टेशनार 53 कॉल आयिल्ले. हातूंत उज्या सयत हेर आपत्कालीन घडणुकां खातीर कॉल आयिल्ले.
गोंयांत गरमी वाडिल्ल्यान सुकिल्ल्या तणाक उजो लागपाच्या घडणुकांनी वाड जायत आसा. फाटल्या 50 दिसांत दळाक आयिल्ल्या 680 उज्याच्या कॉला पैकीं सगल्यांत चड 400 कॉल हे सुकिल्ल्या तणाक लागिल्ल्या उज्या खातीर आशिल्ले. हातूंतले 66 कॉल हे दिवचल स्टेशनार आयिल्ले. कोयर आनी कावला अड्ड्यांक लागिल्ल्या उज्या खातीर 58 कॉल आयिल्ले. जाल्यार रान वाठारांत लागिल्ल्या उज्या खातीर 44 कॉल आयिल्ले. हातूंतले 10 कॉल दिवचल वाठारांतले आशिल्ले.
उज्याचे सोडून आयिल्ल्या हेर 272 कॉला पैकीं 103 हे हेर आपत्कालीन घडणुकां खातीर आशिल्ले. जाल्यार जनावरांक वाटावपा खातीर 102 कॉल आयिल्ले. हातूंत लेगीत सगल्यांत चड 16 कॉल हे दिवचल वाठारांतले आशिल्ले. तशेंच रस्त्यार तेल, रसायनां पडप (27), बुडपाच्यो घडणुको (19), एखादे सुवातेर मनीस आडकून पडप (14), अपघात (4) कॉल आयिल्ले. बुडपाच्या 19 कॉला पैकीं सगल्यांत चड चार कॉल हे कुडचडें वाठारांतले आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
