भांगरभूंय | प्रतिनिधी
पणजीः उजो पालोवपी दळान आपल्या कर्मचाऱ्यांक उजो पालोवपाचो धोको भत्तो दिवपाची मागणी केल्ली. सरकार हाचो विचार करीत आसा. उज्याचो धोको भत्तो दिवपाची कल्पना चालू अर्थीक वर्सा चालू आसा अशें मुख्यमंत्री डॉ. प्रमोद सावंत हांणी सांगलें. ते सोमारा राष्ट्रीय उजो पालोवपी दळाच्या दिसा निमतान आयोजीत केल्ल्या कार्यावळींत उलयताले. ह्या वेळार मुखेल सचीव व्ही कांदावेलू, संचालक नितीन रायकार आनी हेर अधिकारी हाजीर आशिल्ले.
उजो वा हेर खंयचोय अपघात आसूं, उजो पालोवपी दळाचे कर्मचारी सगळ्यांत पयलीं पावतात अशें मुख्यमंत्र्यान सांगलें. जवान आपल्या जिविताची काळजी घेनासतना निसुवार्थीपणान वावुरतात. तोकतें चक्रीवादळ, कोवीड वा हेर खंयच्याय आपत्कालीन परिस्थितींत सैनिकांनी उल्लेखनीय कामगिरी केल्या. लश्करांतले कर्मचारी स्वताचो जीव धोक्यांत घालून हेरांचो जीव वाटावतात. ह्या कारणाक लागून तांकां उज्याच्या धोक्याचो भत्तो दिवपाची येवजण आसा.
राज्य उजो पालोवपी दळा कडेन अत्याधुनीक उपकरणां आनी सुविधा आसात. हेर राज्यांतले सैनिक हांगाच्या केंद्रांत प्रशिक्षण घेतात. आणीबाणीच्या वेळार सैनिकांक मजत करपा खातीर 350 आपत्ती इश्ट आनी इश्ट देशांक प्रशिक्षण दिलां. सरकारान 340 कोटी रुपया खर्च करून चक्रीवादळा वेळार उपेगी पडपी 11 आश्रय केंद्रां उबारल्यांत. सध्या ह्या केंद्राचो तात्पुरत्या स्वरूपांत ताचो वापर उजो पालोवपी दळ वा पुलीस करतात अशें मुख्यमंत्र्यान सांगलें.
उजो पालोवपाचें प्रमाणपत्र म्हणल्यार छळ न्हय
इमारत बांदकाम वा हेर वेवसाय सुरू करचे पयलीं उजो पालोवपाचें प्रमाणपत्र घेवप गरजेचें आसता. अशें प्रमाणपत्र म्हणल्यार छळ अशें कांय जाणांक दिसता. पूण उद्देग, ताच्या कर्मचाऱ्यांचे आनी थंयच्या रहिवाशांचे सुरक्षे खातीर अशें प्रमाणपत्र गरजेचें आसता. फुडाराक अपघात जावचे न्हय हे खातीर उजो पालोवपी दळान थारायिल्ले नेम पाळप म्हत्वाचें.
ड्रोन, रोबोट वापरून पालयलो उजो
ह्या वेळार पंगडान वेगवेगळ्या उजो पालोवपाच्या पद्दतींचे निदर्शन सादर केले. ह्या काळांत ड्रोन आनी रोबोट वापरून उजो पालोवपाचीं निदर्शनां जालीं. सैनिक बेगीन पावूंक शकनात अशा सुवातींनी हीं साधनां वापरतात. सध्या दळांत हें उपकरणां नासलें तरी फुडाराक हें उपकरण मेळटलें अशी आस्त वरिश्ठ अधिकाऱ्यांनी उक्तायल्या.
– दळान एका वर्सात 403 लोकांचो वाटायलो जीव
– दळाक 44.36 कोटींचीं मालमत्ता वाटावपाक येस
– एका वर्सात 9,773 कॉल,
– वर्सभरांत 19.38 कोटी रुपया मालमत्तेचें लुकसाण.
– वेगवेगळ्या आणीबाणीच्या वेळार 121 लोकांक आनी 63 जनावरांक मरण आयलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
