भांगरभूंय | प्रतिनिधी
भांगरभूंय । प्रतिनिधी
पणजीः उजो पालोवपी दलान 2023-24 वर्सा राज्यांत 33.35 कोटीं रुपया मोलाची मालमत्ता वाटायली तशेंच 196 मनशांचो आनी 692 जनावरांचो जीव वाटायलो. पोरूंचे तुळेत 13 कोटी रुपयांची चड मालमत्ता वाटायली. 2022-23 वर्सा 19.64 कोटी रुपयांची मालमत्ता 144 व्यक्ती आनी 727 जनावरांचो जीव वाटायल्लो.
मेळिल्ले म्हायती प्रमाण 2023-24वर्सा उजो पालोवपी दलाक मजती खातीर 7918 जांणानी उजो पालोवपी दलाच्या कार्यालयांत फोन केले. तातूंतले 3136 पावसांतले स्थिती संबंदीचे आशिल्ले. बार्देश तालुक्यांतल्यान सगल्यांत चड 1387 जांणांनी फोन केले. ताचे फाटल्यान साश्ट (1140), तिसवाडी (1034), फोडें (991), दिवचल (655) आनी पेडण्याचो(615) नंबर लागला. उजो लागपाच्या आनी हेर घडणुकांक लागून 129 व्यक्ती आनी 65 जनावरांक जीव वोगडावचो पडलो.
उजो लागलो हाची म्हायती दिवपी कॉलां उपरांत पावसा कडेन संबंदीत आशिल्ल्या घडणुकां विशीं 2023-24वर्सा 2742 कॉल आयले. तातूंत कुडचडे हांगच्या उजो पालोवपी दलाच्या केंद्रांत 281 कॉल आयले. ते उपरांत पेडणे केंद्रांत 235 कॉल आयले. 2022-23 वर्सा 3521 कॉल उज्या संबंदी, 1776 हवामानां कडेन संबंदीत आशिल्ल्या घडणुकां खातीर आशिल्ले. सगल्यांत चड 1257 कॉल बार्देश तालुक्यांतल्या आयले.
2023-24 वर्सा तणाक वा रानांक लागल्ल्या उज्या संबंदी येवपाच्या कॉलांचो आंकडो 2022-23 चे तुळेत उणो आशिल्लो. 2022-23 वर्सा 1873 कॉल आनी रानांक उजो लागिल्ले खातीर 488 कॉल आयिल्ले. 2023-24 वर्सा तणाक उजो लागिल्ले खातीर 1629 आनी रानांत उजो लागिल्ले खातीर 313 मेळून 1964 कॉल आयिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
