भांगरभूंय | प्रतिनिधी
मुख्यमंत्री डॉ. सावंत; 169 कोटींची मालमत्ता वाटायली
भांगरभूंय I प्रतिनिधी
पणजी : राज्यांत अंदूं उज्यो लागपाच्या घडणुकांनी सुमार 81 कोटींचें लुकसाण जालें. जाल्यार 169.53 कोटी रुपयांची मालममत्ता वाचोवपाक उजो पालोवपी दळाक येस आयलें. तशेंच अंदूं उजो पालोवपी दळाक 7,213 आपत्कालीन कॉल आयले. हातूंतले 3,258 कॉल हे उजो लागपाच्या घडणुकांचे आशिल्ले. जाल्यार 3,955 कॉल हेर आपत्ती संबंदान आशिल्ले.
पणजेत शुक्रारा राष्ट्रीय उजो पालोवपी दीस मनयलो. हे कार्यावळींत मुख्यमंंत्री मुखेल सोयरे ह्या नात्यान उलयताले. ह्या वेळार उजो पालोवपी दळाच्या जवानांनी प्रात्यक्षिकां सादर केली.
उजो पालोवपी दळ ‘आपदा मित्र’ आनी ‘आपदा सखी’ हांंची भरती करता. आपदा मित्र तशेंच आपदा सखीक प्रशिक्षण दितां. 2024 वर्सा सावन आपदा मित्र आनी आपदा सखींची सेवा आपत्ती वेवस्थापनाच्या कामांत घेतले.
केंंद्रीय गृह मंंत्रालयान उजो पालोवपी दळ खात्याक प्रशिक्षण संंस्था म्हूण मान्यताय दिल्या. हाका लागून भायल्या राज्यांतले जवान प्रशिक्षणा खातीर येतात. उजो पालोवपी दळांत 189 जवानांंची भरती जाल्या. आनीक भरती जावपाची आसा. आपत्कालीन सेवेचो दर्जो वाडोवपा खातीर जवानांची भरती तशेंच हेर सुविधा तयार जातल्यो, अशी म्हायती मुख्यमंंत्री डॉ. प्रमोद सावंंत हांणी दिली.
फटीचें कॉल करूं नाकातः मुख्यमंत्री
अंदूं उजो पालोवपी दळाक 9 कॉल फटीचें आयिल्लें. फटीचे कॉल येवप ही गंंभीर गजाल आसा. हाका लागून खात्याची धांवपळ जाता. फटीचो कॉल अॅटेन्ड करता म्हणसर आपत्कालीन कॉल अॅटेन्ड करपाक कळाव जावप शक्य आसा, अशें मुख्यमंंत्री डॉ. प्रमोद सावंंत हांंणी सांंगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
