भांगरभूंय | प्रतिनिधी
बर्च दुर्घटना : स्वेच्छा दखल याचिकेचेर सुनावणी
पणजीः दर्यादेगेवेल्या पंचायतींनी कितले वेपार परवाने जारी केल्यात आनी तातूंतल्या कितल्या जाणां कडेन वैध बांदकाम परवाने आनी ऑकुपन्सी प्रमाणपत्र आसात हाची म्हायती दिवपाचे निर्देश उच्च न्यायालयान दिल्यात. तशेंच बर्च दुर्घटनेत मरण आयिल्ल्या कितल्या जाणांच्या कुटुंबांक भरपाय दिली हाचो तपशील सरकाराक सादर करपाक सांगलां.
6 डिसेंबर 2025 दिसा हडफडें उजो घडणुकेंत 25 जाणांक मरण आयिल्लें. ह्या प्रकरणांत गोंय उच्च न्यायालयान स्वेच्छा याचिकेची दखल घेतल्या. आयज सोमारा, 16 फेब्रुवारीक हे याचिकेचेर सुनावणी जाली. सुनावणी उपरांत अॅड. जनरल देविदास पांगम हांणी ही म्हायती दिली. मेल्ल्या मनशाच्या कुटुंबांक लुकसाण भरपाय (सानुग्रह अनुदान) दिवपा संबंदीत प्रकरणाची सुनावणी 24 फेब्रुवारीक जातली. लुथरा भाव आनी आदले सरपंच सयत प्रतिवादींनी आपलीं जाप दाखल करपाक वेळ मागिल्लो. ही वेळ मान्य जाली. सगल्या पक्षांनी आपलीं जाप सादर केले उपरांत फुडली सुनावणी जातली.
फुडाराक बर्च उडो सारकिल्ल्यो घडणुको घडच्यो न्हय म्हूण दीर्घकाळ प्रतिबंधात्मक उपायांची तपासणी करप हो हेत आसा. बर्च सारकिल्या दुर्घटनांक जापसालदार आशिल्ल्या अधिकाऱ्यांची जापसालदारकी थारावपाच्या मुद्द्याचेरुय चर्चा जाली. जापसालदारकीच्या उपाय येवजण्यांचो भाग म्हूण जीवितहानीक कारण थारिल्ल्या अधिकाऱ्यांची मालमत्ता जप्त करूं येता काय? हाचेरूय विचार सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
