भांगरभूंय | प्रतिनिधी
हे विशीं उच्च न्यायालयांत प्रतिज्ञापत्र सादर करतले: उगवें ग्राम संघर्ष समितीची शिटकावणी
पेडणें: उच्च न्यायालयाच्या निर्देशां उपरांतूय पेडणेंच्या उगव्यां तेरेखोल न्हंयेच्या पात्रांतल्यान बिगर गोंयकार बेकायदेशीरपणान रेंव उसपून सरकारी मालमत्तेची चोरी करपाक पेटल्यात. उगवेंच्या ग्रामस्थांनी हे विशीं जायते फावट कागाळ करून लेगीत हाचेर कारवाय जायना. हे विशीं उच्च न्यायालयांत प्रतिज्ञापत्र सादर करपाची शिटकावणी उगवें ग्राम संघर्ष समितीन दिल्या.
हे विशीं उगवेंच्या ग्रामस्थांच्या वतीन, उगवें ग्राम संघर्श समिती वतीन राघोबा महाले, उदय महाले आनी विनायक महाले हांणी एक निवेदन १७ मार्च दिसा उपजिल्लोधिकारी तशेंच नोडल अधिकारी उत्तर गोंय, पेडणेंचे उपजिल्लोधिकारी, पुलीस उपअधीक्षक पेडणें, पेडणें पुलीस निरीक्षक आनी मोपा पुलीस निरीक्षक हांकां सादर केलां.
हातूंत म्हणलां, पेडणें म्हालांतल्या उगवें गांवचे हद्दींतल्यान तेरेखोल न्हंयेंतल्यान बेकायदेशीरपणान जावपी रेंव उसपपा विशीं ग्रामस्थांनी जायत्यो कागाळी दाखल केल्यात. मात शासकीय यंत्रणां हाचे कडेन आडनदर करतात. रेंव उसपिल्ल्यान सैमाचो तोल इबाडटा आनी केन्नाच भरून येना इतलें सैमाचें लुकसाण जाता.
उच्च न्यायालयान सुमोटो रिट याचिका निकालांत काडटना राज्य सरकाराक गोंयच्या बेकायदेशीर रेंव काडप वा ताची येरादारी जावची ना, हाची खात्री करपा खातीर खर उपाय काडपाचे आदेश दिल्ले. उच्च न्यायालया कडल्यान आदेश दितना सरकारी अधिकार्यांनी आनी सरकारान हे विशीं कसलेच उपाय करूंक नात. उलट पेडणेंच्या तेरेखोल न्हंयेच्या पात्रांत बेकायदेशीरपणान रेंव उसपप चालूच आसा. हाका लागून उच्च न्यायालयाच्या आदेशाचो अपमान जातना दिसता, अशें निवेदनांत म्हणलां.
हे विशीं बेगोबेग उपाय करिना जाल्यार कागाळदार उगवें ग्राम संघर्ष समितीक उच्च न्यायालयांत प्रतिज्ञापत्र दाखल करचें पडटलें, अशें कागाळींत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
