भांगरभूंय | प्रतिनिधी
म्हापशें, प्रतिनिधी ः मुंबय उच्च न्यायालयाच्या गोंय खंडपीठाचें हुंड्या खातीर छळ केल्ल्या गुन्यांवाचें बनावट निवाडो पत्र तयार करून ‘न्यायालयान फिर्यादींची कागाळ भायर मारली आनी ताचे सयत तांकां अटक वॉरन्ट काडला’ असो भासोवपाचो यत्न करपाच्या आरोपा वयल्यान पर्वरी पुलिसांनी दुबावीत क्रेग फ्रॅन्क जेन्सन (रा. बंगळूरू) हाचे आड फटींगपणाचो गुन्यांव नोंद केला.
कागाळदार आदेरिटा कोचरेन जेन्सन (रा. बंगळुरू) हांणी २०२० वर्सा दुबावीत देर क्रेग फ्रॅन्क जेन्सन आनी सासूमाय हांचे आड हुंड्या खातीर छळ केल्ल्याची कागाळ पुलिशेंत केल्ली. ते प्रमाण पुलिसांनी गुन्यांव नोंद केल्लो. हे विशीं न्यायालयांत आरोपपत्रूय दाखल केल्लें. ह्या गुन्यांवा वेळार फिर्यादी आनी दुबावीत पर्वरे रावतालीं.
दुबावितान ह्या खटल्याचें उच्च न्यायालयाचें बनावट निवाडो पत्र तयार केलें. फिर्यादींची याचिका न्यायालयान भायर मारली. तशेंच तांकां अटक वॉरंट जारी केल्ल्याचें ह्या आदेशपत्रांत नमूद केल्लें. उपरांत दुबावितान हें बनावट आदेशपत्र फिर्यादींच्या वळखीच्या रीचर्ड पॅट्रीग हाका वॉट्सऍपार धाडलें. तांणी कागाळदारांक हे विशीं म्हायती दिली.
तांणी हे विशीं पर्वरे पुलिसां कडेन संपर्क केलो. तेन्ना हें आदेशपत्र बनावट आशिल्ल्याचें समजलें. ताका लागून कागाळदारांनी दुबावितां आड कागाळ नोंद केली. ते प्रमाण पुलिसांनी गुन्यांव नोंद केला. फुडलो तपास पुलीस निरीक्षक राहुल परब हांच्या मार्गदर्शना खाला उपनिरीक्षक अरूण शिरोडकार हे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
