भांगरभूंय | प्रतिनिधी
आदेश दिवपाचो राज्यपालांक अधिकारः केंद्रीय कायदो मंत्र्याची राज्यसभेंत जाप
भांगरभूंय । प्रतिनिधी
पणजी : उच्च न्यायालयाचें कामकाज हिंदी वा थळाव्या भाशांनी जावपा विशीं आदेश दिवपाचे अधिकार राज्यपालांक आसात. राष्ट्रपतींच्या आदेशा उपरांत संबंदीत राज्यांचे राज्यपाल राज्यांतल्या उच्च न्यायालयांक कामकाज हिंदी, राजभास वा थळाव्या भाशेंत जावपा विशीं आदेश दिवंक शकता. घटनेच्या 348 (2) ह्या परिशिश्टांत अशी तजवीज आसा. केंद्रीय कायदो आनी न्याय खात्याचे मंत्री अर्जून राम मेघवाल हांणी राज्यसभेंत अशी लेखी जाप दिल्या.
सर्वोच्च न्यायालय तशेंच सगळ्या उच्च न्यायालयाचे कामकाज इंग्लिशींतल्यान जातलें, अशें घटनेच्या 348 (1) परिशिश्टांत आसा. हाचे परस 348 (2) परिशिश्ट वेगळें आसा. उच्च न्यायालयाचें कामकाज हिंदी, राजभास वा त्या राज्यांतले थळावे भाशेंतल्यान जावप शक्य आसा. हे खातीर राज्यपालांनी आदेश दिवपाक जाय. राष्ट्रपतींची मान्यताय घेतले उपरांत आदेश जारी करपाचे अधिकार राज्यपालांक घटनेच्या 348 (2) परिशिश्टान दिल्यात.
तशेंच उच्च न्यायालयांत इंग्लिश भाशे सयत हिंदी वा राजभाशेंतल्यान निवाडो वा आदेश दिवपाक लावपाचे अधिकार राजभास कायद्यान लेगीत राज्यपालांक दिल्यात. राजभास कायदो 1963 च्या कलम 7 मदीं ही तजवीज आसा. हाचे खातीर लेगीत राज्यपालांनी राष्ट्रपतींची मान्यताय घेवपाक जाय.
सर्वोच्च न्यायालयाचे निवाडे हेर भाशांनी अणकारींत करपाचो वावर सुरू जाला. उच्च न्यायालयांत लेगीत थळाव्या भाशांनी निवाडे, आदेश दिवपाचो वावर सुरू जातलो, अशें तेन्नाचे सरन्यायाधीश धनंजय चंद्रचूड हांणी स्पश्ट केल्लें. धनंजय चंद्रचूड हे सरन्यायाधीश म्हूण निवृत्त जाल्यात. मेरशे जिल्हो आनी सत्र न्यायालय संकुलाच्या उक्तावणा वेळार मुखेल सोयरे ह्या नात्यान उलयतना तेन्नाचे सरन्यायाधीश धनंजय चंद्रचूड हांणी ही म्हायती दिल्ली. गोंयांतल्या उच्च न्यायालयांत कोंकणी वा मराठीचो वापर जावपाक जाय जाल्यार राज्यपालांनी राष्ट्रपतींचे मान्यतायेन आदेश जारी करपाक जाय. राज्यसभेंतले लेखी जापेंतल्यान ही गजाल स्पश्ट जाता. उच्च न्यायालयाचें कामकाज राजभास कोंकणींतल्यान करपा विशीं आदेश दिवपाचे अधिकार राज्य सरकाराक नात, मात घटनेन हे अधिकार राज्यपालांक दिल्यात.
न्यायालयीन अधिकारी कोंकणी प्रशिक्षणा पसून पयस
गोंयांतल्या उच्च न्यायालयांत सगळे कामकाज इंग्लिशींतल्यान जाता. निवाडे, आदेश इंग्लिशींतल्यान जातात. जिल्हो तशेंच हेर न्यायालयांनी लेगीत इंग्लिशींतल्यानूच कामकाज जाता. कोंकणी ही गोंयची राजभास आसा. सरकारी कामकाजांत कोंकणी सयत मराठीचो वापर करपाची तजवीज आसा. कोंकणी वा मराठींतल्यान न्यायालयांतले आदेश वा निवाडे जारी जाय नात. सरकारी कामकाजांत कोंकणी तशेंच मराठीचो वापर जावचो म्हूण सरकारचे यत्न चालू आसात. सरकारी अधिकाऱ्यांक प्रशिक्षण दिवपी कार्यावळींचें आयोजन जाता. न्यायाधीश वा न्यायालयीन अधिकाऱ्यांक मात कोंकणी भाशेचें प्रशिक्षण दिनात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
