भांगरभूंय | प्रतिनिधी
भांगरभूंय । प्रतिनिधी
सांगेंः उगें- सांगें हांका सर्वे नंबर 52/0 हातूंत बेकायदेशीर खडी खणी चल्ल्यांत. सांगे पुलीस स्टेशनाच्या सामकार आशिल्ल्या रस्त्या वयल्यान थंयच्या खडीची येरादारी चलता. सांगेचो पुलीस निरीक्षक हाचे आड कसलीच कारवाय करना. संबंदीत सरकारी यंत्रणेन व्हो खणी बंद केल्या ना जाल्यार न्यायालयांत वतले अशी शिटकावणी समाज वावुरपी तेलोतीन काबो हाणे सांग्यार घेतिल्ले एके पत्रकार परिशदेंत दिल्या.
उगें वाठारांत फाटल्या कांय वर्सां सावन खडीच्यो खणी चलतात. तांची पळोवणी करून कायदेशीर कारवाय करपा संबंदी आपणे सांगे पुलीस स्टेशन, उपअधिक्षक, सांग्याचो मामलेदार, उपजिल्होधिकारी. दक्षीण गोंयचो जिल्होधिकारी,खण खातें तशेंच उगें पंचायतीत निवेदना दिल्यांत. मात सगळेच कारवायेच्या नांवान आडनदर करतात. राजकी आशिर्वाद आसले बगर व्हो खणी चलच्यो नात अशें काबो हाणे सांगलें.
खडी खणीवाल्यांनी आपली लिजाची पांच हजार चौखण मीटर जमीनसोडून दरेकी वीस हजार चौखणी मीटर सरकारी जमनींत अतिक्रमण करून खडी काडपाचो वेवसाय चलयला. ताका लागून सरकाराची कोट्यांनी रुपयांची येणावळ बुडल्या. सरकारान ह्या खणींचेर कारवाय करून जें लुकसाण जालां तें तांच्या कडल्यान वसूल करचें अशी सूचोवणी काबोन केल्या.
सकाळीं 6 वरां सावन खडीची येरादारी चलता. आतां शाळा सुरू जाल्यात. खडीची येरादारी करपी ट्रकांचो विद्यार्थ्यांक धोको आसा. हेल्मेट घातलें ना आनी हेर साध्या कारणा खातीर पुलीस वाहनचालकांक तालांव दितान. मात पुलीस स्टेशना सामकारच्या खडेची बेकायदेशीर येरादारी चलता ताचेर कारवाय करपाक सांगे पुलीस स्टेशनाचो निरीक्षक कित्याक अनमनता असो प्रश्न करून ह्या बेकायदेशीर वेव्हाराक तांचो तेंको आसा अशें आमी समजवचें कांय कितें अशें काबो हाणे विचारलां.
सैमाची, पर्यावरणाची राखण करपाक आमी वावुरतात. सरकारी जमनींत अतिक्रमण जावचें न्हय हे खातीर आमी यत्न करतात. खडी माफिया आमकां धमकी दितात. सगळें चल्ला हें एक सेटींग आसा. ताका लागून कागाळ करून लेगीत कसलीच कारवाय जायना असो आरोप काबो हाणे केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
