भांगरभूंय | प्रतिनिधी
भांगरभूंय । प्रतिनिधी
सांगेंः उगें पंचायत कार्यालया फाटल्यान तशेंच कॉलनी मैदाना कडेन स्थलांतरीतांनी राजकारण्यांच्या आशिर्वादान सरकारी जमीन बळकावपाचें काम चलयलां. कांय जांणी थंय घरां बांदल्यांत आनी आपल्या सोयऱ्यांक बांदून दिल्यांत. अशें तरेन ह्या वाठारांत तयार जाता ते झोपडपट्टी कडेन संबंदीत सरकारी यंत्रणा लक्ष दिना हाका लागून थळावे लोक तिडक उक्तायतना दिसतात.
गोंयकारांक सादो संडास बांदपाचो जाल्यार ना हरक दाखलो मेळपाक कुस्तार जाता. मात उगें पंचायत मंडळान ह्या स्थलांतरीतांक सरकारी जमनीन बेकायदेशीरपणान बांदिल्ल्या घरांत संडास कशें बांदून दिले, असो प्रश्न लोक विचारतात. राजकारण्यांक हाताक धरल्यार कितेंय करपाक जाता हें पाजीमळार दिसता. एका स्थलांतरीना जाल्यार राजकारण्याच्या आशिर्वादान जागो हडप करून डोझर घालून ताचें लेव्हलिंग करून घेतलां. आपली व्होट बँक तयार करपा खातीर राजकारणी सरकारी जमनी लूटपाक स्थलांतरीतांक जल दितात असो लोकांचो आरोप आसा.
थळावो आमदार आनी मंत्री सुभाष फळदेसाय हांणी हालींच सरकारी जमीन हडप केल्या तांचेर करपाची शिटकावणी दिल्ली. ताची सुरवात तांणी पाजेमळा सावन करची अशी सूचोवणी तांका लोकांनी केल्या. उदकास्रोत खात्याच्या सांग्या वयल्या अभियंत्या कडेन चवकशी केली तेन्ना तांणी बळकायल्ले जमनीची पळोवणी करून कारवाय करतले तशेंच सरकारी जमनी सरभोंवतणी दुरीग बांदतले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
