भांगरभूंय | प्रतिनिधी
तेलोतीन काबोः सांगे पुलिसांचेर आडनदर केल्ल्याचो आरोप
भांगरभूंय । प्रतिनिधी
सांगें: उगें सांग्यार सर्व्हे क्र. 52/0 त फाटलीं कितलीशींच वर्सां बेकायदो खडी कोरी चलतात. हें खबर आसून लेगीत पुलीस तशेंच संबंदीत खात्यान दोळ्यार पट्टी बांदल्या. बेगोबेग जर हाचेर कारवाय केली ना जाल्यार आंदोलन करचें पडटलें, अशी शिटकावणी समाज वावुरपी तेलोतीन काबो हांणी दिली. सांग्यार घेतिल्ले पत्रकार परिशदेंत ते उलयताले. तांचे वांगडी निकी गोम्स आनी मिल्टन गोम्स हाजीर आशिल्ले.
उगें सर्वे क्र. 52/0 त पांच पांच बेकायदो लिजां चलतात. आपणे 2021 सावन आरटीआय मागोवन पेपर काडल्यात. मीन खातें सांगतां, ह्य. कोरी रिन्यूव्ह करपाक मेळनात. जाल्यार लीज सोंपले उपरांत लेगीत कोरी कश्यो चलतात, असो प्रस्न काबो हांणी उपस्थीत केलो.
हे विसीं आपणें सांगें पुलीस स्टेशनाचेर कागाळ दाखल केली, तेन्ना पुलीस निरिक्षकान आपल्याचेर 107 कलम लावन गुन्यांव दाखल केलो. आपणें सांगें मामलेदार, सांगे उपजिल्होधिकारी, सांगें पुलीस स्टेशन, पुलीस उपअधिक्षक, पुलीस अधिक्षक, खण खातें हाचे कडेन कागाळ केल्या. पूण सगळीं खातीं कित्याक ओगी रावल्यात तें कळना. सांगें पुलीस स्टेशनाच्या दारांतल्यान बेकायदो खडीची येरादारी चलता. पुलिसांक तें दिसता, पूण ते तांचे कडेन आडनदर करता, असो आरोप काबो हांणी केलो.
एक लीज 5 हजार चौखण मिटर आसा. ते जमनीर 16 हजार 500 चौखण मिटरांचो फातर काडटात. दुसरो लीज 5080 चौखण मिटर आसा, तो 10,500 मिटर चौखण फातर काडटा. तिसरे कडेन 7050 चौखण मिटर लीज आसा, तो 11,2000 चौखण मिटर फातर काडटा. चवथो लीज 5 हजार चौखण मिटर आसा, तो 17 हजार चौखण फातर काडटा. पांचवो लीज 6 हजार चौखण मिटर आसा, तो 9 हजार चौखम मिटर फातर काडटा. ही इतली लूटमार, सरकाराची इतली जमीन हडप करून लेगीत संबंदीत खातें ओगी आसा, अशें काबो हांणी सांगलें.
हे विशीं गांवच्या लोकांनी मुख्यमंत्री डॉ. प्रमोद सावंत हांकां विधानसभा वेंचणुके आदीं उगें पंचायतींत एके कार्यावळीक हाजीर राविल्ले तेन्ना ह्या बेकायदो कोरींची फायर दिल्ली. त्या वेळार तांणी सांगिल्लें, कोरी आपूण बंद करतलों. ज्या अधिकाऱ्यांनी तांचें उतर पाळूंक ना, त्या अधिकाऱ्यांचेर कारवाय जावपाक जाय, अशी मागणी काबो हांणी केली. लीज केल्ली सुवात सोडून जी हजारांनी चौखण मिटर जमीन खणल्या ताचो पयसो सरकारी तिजोरेंत वचपाक जाय. हे जमनीचो परतून सर्व्हे करून जे हजारांनी चौखण मिटर जमनीचेर अतिक्रमण करून फातर काडल्यात ताची कोट्यांनी रुपयांची वसुली करून घेवची. ह्या प्रकरणांत थळावे आमदार सुभाष फळदेसाय हांणी लक्ष घालून ह्यो बेकायदो कोरी बंद करच्यो, अशी मागणी काबो हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
