उगवें सावन ओंकार पावलो पोरस्कड्यां

भांगरभूंय | प्रतिनिधी

पेडणें : ओंकार हतयान तीन दीस उगवें वाठारांत धुमाकूळ घातले उपरांत ताणें पोरस्कडें वाठारांत येवन कवाथे, केळमें खावपाक सुरवात केल्या.

ओंकार हतयान रानां खात्याच्या कर्मचाऱ्यांक घाम काडला. हातांत मशाली आनी सुतळी बॉम्ब घेवन रावचे बगर चड कांयच करपाक शकनात. सरकारी यंत्रणा ह्या हतयाचो बंदोबस्त करपाक अपेशी थारल्या. हे खातीर लोक खर नाराजी उक्तायतात. अजून मेरेन मनीसहानी जावंक ना, पूण एकाद्या वेळार दुर्घटणा घडली जाल्यार ताका जापसालदार कोण, असो प्रस्न लोकांनी उपस्थीत केला.

ओंकार हतयान तीन दीस उगव्या सारले. थंय ताणें कवाथे, केळम्या वांगडाच तीन गाडयांची व्हड प्रमाणांत नासधूस केल्ली. ते उपरांत 3 डिसेंबराक ओंकारान रातच्या 8.30 वरांच्या सुमाराक निगळे पोरस्कडे वाठारांत पावल दवरलें आनी सोमतीच थंयच्या केळमे, कवाथ्यांचो इबाड करपाक सुरवात केली. थळाव्या लोकांनी ओंकार हतयाक विरोध करिनासतना ताका केळीं खावपाची संद दिली. ते उपरांत रानां खात्याचे कर्मचारी हातांत मशाली घेवन ओंकार हती खंय वता, कितें करता, ताची पळोवणी करीत रावले. ताचे बगर ते आनीक कांयच करपाक शकनाशिल्ले.

ओंकार हती दीसभर रानांत वचून रावता आनी सूर्य अस्तमले उपरांत लोकवस्तींत घुसून थंय जें मेळटां तें खावपाक सुरवात करता, अशें चित्र पोरस्कड्यां दिसपाक लागलां.